Vinars ai 10 di Dicembar a Udin si fevele de Europe e dal so avignî. A 2 e mieze dopo di misdì inte Aule 2 dal pôl economic juridic di Vie Tomadini 30/a il Centri di Documentazion Europeane  (CDE) 'Guido Comessatti' de Universitât dal Friûl, cu la colaborazion de Academie Europeiste dal Friûl-VJ e cul jutori de Rapresentance in Italie de Comission Europeane, inte suaze des iniziativis di promozion de Conference sul avignî de Europe, al inmanee l'incuintri dal titul Costruire l'Europa che vogliamo: democrazia, diritti, cittadinanza.

A son previodûts i intervents di Claudio Cressati, docent di Storie des dotrinis politichis e responsabil sientific dal CDE 'Guido Comessatti', di Maurizio Maresca, docent  Dirit de Union europeane, e di Giorgio Anselmi, za president dal Moviment federalist european, che a varan un confront in cont des cuistions che a tocjin l'avignî de Union Europeane, jenfri prospetivis di riforme istituzionâl e incressite de integrazion.

Intant dal incuintri la documentaliste dal CDE, Daniela Cattalini, e presentarà il funzionament de plateforme web che cun chê al è pussibil partecipâ ae Conference sul avignî de Europe, presentant osservazions e propuestis par progjetâ l'avignî dal continent e des sôs istituzions e par potenziâ e disvilupâ la sô unitât politiche.

L'apontament al è viert ae partecipazion dai students e plui in gjenerâl dai citadins. 
Si pues jentrâ dome cul certificât vert fint che al sarà puest. Il dibatiment al vignarà regjistrât e po al sarà metût a disposizion dal public sul canâl Youtube dal Ateneu Play Uniud.