La idee di chel progjet, tacât tal an 2024, e je chê di prontâ sintesis etimologjichis di peraulis furlanis che si puedin integrâ in dizionaris de lenghe furlane e di proferîlis al public cuntune politiche di acès viert. In chest moment i dâts a son organizâts intune tabele inte suaze di une pagjine HTML; pal avignî si pense di meti sù une base di dâts in linie plui pratiche di doprâ par cui che al aurìs i dâts che i coventin.

Il progjet al da fûr sintesis etimologjichis, vâl a dî che nol presente la analisi etimologjiche complete des peraulis (che po da cjâf da la sintesi pûr e je), si ben al proferìs lis informazions di fonde daûr di ce che al permet il formât di un dizionari monolengâl.

Par altri al è di tignî cont che ancje lis sintesis etimologjichis scritis tai dizionaris monolengâi a puedin vê diviers formâts cun diviers grâts di concision. Par cheste reson i dâts a son distribuîts tes lôr categoriis (date de prime atestazion, forme de prime atestazion e vie indenant) e i redatôrs dai dizionaris si puedin cjoli framieç lis categoriis ancje dome chês che ur coventin daûr dal formât stabilît pal lôr dizionari.

Lis categoriis dai dâts a corispuindin a lis colonis verticâls de tabele e a son chês chi: Jentrade moderne, Sens de jentrade moderne, Sorte di evoluzion, Etim, Prime atestazion, Date, Autôr, Scrit, Ladin dolomitan, Rumanç, Coment, Fonts dopradis. Inte sezion Vuide par la tabele chi daûr si presentin plui in detai. Ogni rie orizontâl de tabele e scrîf par ordin i dâts di dutis lis categoriis da la peraule studiade. Stant che cussì la sintesi etimologjiche par ogni peraule e forme une rie orizontâl, ven a stâi une striche, alore ogni sintesi publicade inte tabele le clamìn stricute etimologjiche.

Tal ultin, ancje se lis stricutis no son nassudis par jessî tant che une publicazion autonome, si à viodût mo che i dâts etimologjics a dan dongje une stricute, plui stricutis po a metin sù une tabele e alore une tabele ancje la int le pues lei cun profit, e no dome i ordenadôrs, al contrari di une base di dâts.

Fate chê strade al è stât naturâl, za che si resonave sul acès viert, di pensâ ancje a un acès plen. Si spere di jessi rivâts a un bon risultât: la tabele HTML si pues leile cun profit ancje doprant i dispositîfs di leture dai schermis e cussì pûr se i voi da la persone a viodin pôc. Ancje a cui che al viôt ben, par altri, i vignarà comut di doprâ i botons par tornâ a tacâ la rie o di clicâ su la sigle bibliografiche par discrosâle daurman.

Il progjet nol è sierât, la version in linie e ven inzornade cu lis gnovis stricutis etimologjichis almancul une volte ad an.

Vuide par la tabele

Il progjet al à metût sù cuatri pagjinis coordenadis:

• cheste Pagjine mari cu la presentazion dal progjet e la vuide
• la pagjine cu la Tabele cu lis stricutis che a presentin lis sintesis etimologjichis
• une pagjine cu la tabele des Scurtaduris e simbui doprâts inte tabele cu lis stricutis
• une pagjine cu la tabele de Bibliografie des voris dopradis

Dutis lis pagjinis si puedin discjamâ insom de pagjine tai Documents in zonte. Clicant si discjame une cartele comprimude. Fate la decompression, tignît lis pagjinis simpri intune cartele ugnule, cussì a podaran lavorâ la navigazion e i leams di une pagjine a di chê altre.

Lis pagjinis a son ancje in rêt, i rivais clicant chi: Tabele cu lis stricutis. La pagjine e à une navigazion che si pues doprâ par passâ di une pagjine a di chê altre.

Chi daûr si pues lei une descrizion des categoriis dai dâts inte tabele cu lis stricutis.

Jentrade moderne

Chel prin cuadrel di ogni stricute al à la peraule furlane moderne che si cîr la sô etimologjie. La grafie de peraule e dopre i criteris dal furlan codificât uficiâl. Se o cognossìn plui formis alternativis de stesse peraule, alore la etimologjie complete si le cjate li da la forme plui dongje dal etim proponût, ancje cuant che no si trate da la forme sielte pal furlan codificât. Par esempli la jentrade benandant e mande a viodi balandant, dulà che si cjate dute la stricute complete.

Sens de jentrade moderne

Chest cuadrel al è scrit dome cuant che la peraule te jentrade e je ambigue. Chel al vâl, tant a dî, par disseparâ: pigne 'di fâ la spongje', pigne 'cuviert spiçât' e pigne 'pome des Conifaris'.

Sorte di evoluzion

Inta chel cuadrel chi si pant la sorte di rapuart etimologjic che la peraule moderne e à cul etim: la peraule e pues sei l'efiet di une evoluzion regolâr ereditarie dal protoromanic o ben un prestit di une altre lenghe o ben une derivazion di une altre peraule furlane.

Il protoromanic al è la lenghe che si ricostruìs midiant de comparazion da lis lenghis romanichis; la ricostruzion e je une vore dongje da la variante dal latin che si fevelave di regule par dut il teritori dal Imperi Roman e che e jere doprade tant che lenghe francje ancje fûr dal imperi.

Cetancj etimolics a proponin pal furlan etims inta la variante che o clamìn latin volgâr. Une variante cun chei caratars no podìn pensâle doprade fûr dal teritori etnic dal popul latin e dai siei vicins italics, alore e à sens di proponile dome par une part da la popolazion de Italie centrâl. Pal furlan, compagn che par dute la Italie dal Nord, al à sens di ipotizâ che da cjâf al vebi il protoromanic.

Intal cuadrel Sorte di evoluzion si scrîf viôt par mandâ a viodi la etimologjie intune altre stricute co la stricute no à dentri la etimologjie.

Etim

Intal cuadrel si scrîf l'etim che al è da cjâf de peraule furlane moderne. Se la stricute no à la etimologjie, tal cuadrel si scrîf la jentrade de stricute dulà che si cjate la etimologjie.

Prime atestazion

Chel cuadrel al scrîf la prime forme che e ateste tal scrit la peraule scrutinade inte stricute. Se e je dome la forme, al vûl dî che chê forme e à caratars gramaticâi compagns precîs da la forme scrite inte jentrade moderne. Se, impen, e à un trat diviers (par esempli: plurâl impen che singolâr, feminin impen che masculin, timp presint indicatîf impen che infinît e cussì indenant), alore chel trat al è segnât tal cuadrel ancje chel.

Date

Inta chel cuadrel chi si scrîf la date (pal plui l'an) da la prime atestazion scrite intal cuadrel denant.

Autôr

Chest cuadrel al pant il non dal autôr dal scrit cun dentri la prime atestazion tratade intai doi cuadrei denant.

Scrit

Chest cuadrel al mostre il titul o un altri segnâl par individuâ il scrit cun dentri la prime atestazion tratade intai trê cuadrei denant.

Ladin dolomitan e Rumanç

Chei doi cuadrei a scrivin la peraule corelade (ven a stâi la peraule cu la stesse etimologjie, plui o mancul precise) che si cjate intes dôs lenghis sûrs da la lenghe furlane. Di regule si trate da la forme doprade inte lenghe codificade uficiâl (ladin dolomitan e rumanç grison). Se la peraule corelade no je jentrade inta la lenghe codificade ma si le cjate mo intune des variantis locâls, intal cuadrel ci cjate la forme locâl e si precise che si trate di une forme dialetâl.

Coment

Chel cuadrel chi al pant in struc la etimologjie. A voltis ancje la sintesi e scuen sei lungjute, fin masse par jentrâ intun dizionari monolengâl, ma almancul e permet di capî parcè che si pense a chel etim e par ce strade che di li si è rivâts a la peraule furlane. Pecjât che nol è avonde puest par discuti lis etimologjiis alternativis za proponudis di altris studiôs, che par altri a son stadis tignudis in cont intal studi etimologjic da cjâf de stricute.

Fonts dopradis

In chel cuadrel chi si scrivin dome lis fonts che in cualchi maniere a sapontin la etimologjie proponude inte stricute. Nol è il puest par scrivi jù la bibliografie etimologjiche complete pe peraule studiade.