Suns Europe 2022 si siere in bielece e grandece e al conferme la vocazion internazionâl di chel Friûl che al è cussient di se e che par chel si met in relazion positive cun chei altris par promovi il dirit ae lenghe e il dirit ae diversitât par ducj cuancj. La serade finâl di sabide passade cul conciert-concors fat tal teatron Zuan dal Udin e à mantignût lis promessis de vilie e si à davuelte in continuitât  e cun coerence cu la varietât, cu la cualitât e cu la intensitât mostradis de sezion di chest an dal festival european des arts in lenghe di minorance, inmaneât de bande de cooperative Informazione Friulana. 

Sul palc dal “teatron” udinês e je lade in sene une rapresentazion interessante de creativitât musicâl intes lenghis minorizadis de Europe. Il public numerôs e calorôs al è stât menât intun viaç policrom tra rileturis inovativis de tradizion, tant che chê propueste dal duet Ealûs, ispirât rapresentant dal patrimoni linguistic de Sardegne, e contaminazions tra gjenars e lengaçs, tant che la fusion tra poesie, musiche di cjamare e improvisazion jazz des trê slovenis cjarsulinis dai Violoncelli Itineranti, la fusion di melodiis incuietis e uçadis par furlan di Massimo Silverio, l'incuintri visionari e apassionant tra indierock e eletroniche dai galês HMS Morris, lis cjançons intimistis e tarondis de basche Olasz Salvador e il pop cuadrât de band de Basse Sassonie vuidade di Rick Hilberts. 

La zornade, caraterizade ancje des proiezions de serie web imerisve 33/16, une produzion audiovisive par furlan une vore interessante sei pai siei contignûts naratîfs che pe sô realizazion sul plan tecnologjic, e je stade segnade in sierade de musiche dal vîf e duncje de assegnazion dai premis de jurie internazionâl e dal public in sale. Il prin ricognossiment al è lât ai HMS Morris, che a son stâts preseâts pe energjie e pe fuarce de lôr propueste, intant che il secont, dedicât ae memorie di Guglielmo Tonelli, zovin musicist di chent che nus à lassât un an indaûr, al è stât assegnât a Massimo Silverio, che juste par chel si pues calcolâlu il prin furlan “profete in patrie” inte storie dal festival.

La conclusion de otave edizion di Suns Europe e je stade marcjade ancje de assegnazion dal premi “Altre Europe 2022” ae ELEN (European Language Equality Network) pal so impegn continuatîf a pro dai dirits linguistics: une bataie a pro di dutis lis comunitâts e lis lenghis minorizadis dal nestri Continent e pe costruzion di une altre Europe, plui juste e plui democratiche.