Si sint ancjemò il rivoc dai ultins apontaments di Suns Europe 2022, la edizion di chest dal festival european des arts in lenghe minorizade che dopo dai events fats vie pal Istât si à sierât ai 25 e ai 26 di Novembar.

La manifestazion inmaneade de cooperative Informazione Friulana, la societât editore di Radio Onde Furlane, ancje inte sô seconde part e à proponût trê events un miôr di chel altri. Il prin al è stât fat vinars ai 25 inte Mediateche 'Ugo Casiraghi' di Gurize, là che e al è stât metût adun un confront une vore concret e di sostance in cont di une cuistion che e tocje in maniere fuarte e direte il Friûl in gjenerâl e soredut chel Gurizan: chê de assegnazion a Nova Gorica e a Gurize dal titul di Capitâl Europeane de Culture pal 2025 e de maniere che chest titul al puedi pardabon jessi une ocasion par promovi lis dôs citâts di ca e di là dal clap e dut il teritori dal Gurizan, tra culture, cussience civiche e disvilup sociâl e economic, e duncje par dâ visibilitât ancje ae sô pluralitât linguistiche e culturâl. 
Par chel a son stadis presentadis lis esperiencis fatis, cualchi an indaûr, de citât basche di Donostia-San Sebastián, tal Stât spagnûl, e di chê frisone di Ljouwert-Leeuwarden, intal Ream dai Paîs Bas, dutis dôs Capitâls Europeanis de Culture, une tal 2016 e chê altre tal 2018. Paul Bilbao Sarria al à contât di cemût che la rêt di associazions Kontseilua e veve metût adun il Protocol pe difese dai dirits linguistics, Ernst Bruinsma al à dât cont de maniere che la capitâl de Frisie e à “tirât fûr” la sô lenghe proprie e la sô identitât cun spirt european e internazionâl, vuadagnant ancje il titul UNESCO pal 2019 di Citât de Leterature e al à puartât il so contribût ancje il cornic Davyth Hicks, segretari gjenerâl de ELEN (Rêt Europeane pe Avualiance Linguistiche), fevelant di Europe, lenghis e dirits.

Dal incuintri – là che a jerin ancje il president de ARLeF, Eros Cisilino, l'assessôr pes politichis linguistichis dal Comun di Gurize, Maurizio Negro, il president regjonâl de SSO, Walter Bandelj, e chel dal Gurizan de SKGZ, Marino Marsič, in rapresentance de comunitât slovene, e il president de Academie Europeiste, Claudio Cressati, e Elena Gasparin de clape dai Amîs de Mont Quarine di Cormons – al è saltât fûr che e covente une azion gjenerâl di comunicazion là che a vegnin  dopradis dutis lis lenghis dal teritori e si à di meti adun progjets e intervents culturâi che a tegnin cont ad in plen di chê pluralitât e di chê complessitât.  Tant a dî che Nova Gorica-Gorizia 2025 e sarà pardabon Capitâl Europeane de Culture se e darà spazi e visibilitât ancje ae lenghe furlane e ae sô produzion culturâl.