Le notizie dello Sportello

Certificazion linguistiche pal furlan, al è fûr il bant pai certificadôrs. La scjadince pes candidaturis e je ai 9 di Jugn. Il cors di formazion al ven inmaneât de Universitât dal Friûl

Il percors par meti in vore il sisteme di certificazion linguistiche pal furlan al va dilunc.
La ARLeF e à dât fûr il bant, dome par titui, pe partecipazion al cors-concors che al permet di cjatâ fûr i certificadôrs des comissions di esam par assegnâ i nivei di cognossince de lenghe furlane, lant daûr dal Cuadri comun european des lenghis.

Il bant al è destinât a cui che al à plui di 18 agns e une cognossince otime de lenghe furlane fevelade e scrite (grafie uficiâl, articul 13 de L.R. 15/96). 

La scjadince pe presentazion des candidaturis e je chê dai 9 di Jugn dal 2022.

La Comission esaminadore e selezionarà i candidâts valutant il lôr curriculum vitae e e formarà une graduatorie di merit, daûr dai ponts assegnâts.

A saran ametûts i prins vincj candidâts in graduatorie, che a podaran partecipâ al cors e, dopo di un esam specific, otignî la certificazion di competence de lenghe furlane corispondente al nivel C2. 

La ativitât formative (in modalitât ‘blended') e vignarà inmaneade dal CIRF de Universitât dal Friûl, tra i mês di Jugn e di Otubar, e e durarà 50 oris.

I partecipants al cors che a varan otignût la certificazion di competence de lenghe furlane di nivel C2 a saran sielzûts de ARLeF pe costituzion des comissions di esam pe certificazion. 

Il bant complet al è disponibil sul sît de ARLeF.

Par dutis lis informazions su la selezion, i concorints a puedin indreçâsi a chescj recapits: tel.: 0432.555812 – pueste eletroniche: arlef(at)regione.fvg.it 

Indietro