Ai 19 di Mai al cole il 72esim inovâl dal inviament des Lotis dal Cormôr, la mobilitazion popolâr pal lavôr, pai dirits e pe dignitât de int de Basse Furlane, puartade indenant vie pe Vierte dal 1950  midiant de forme di proteste dal siopar par ledrôs.

Tal 2020, in ocasion de ricorince taronde dai Setante agns, a jerin stadis metudis adun di une rêt di sogjets, che fra  chei e jere ancje la Universitât dal Friûl, diviersis iniziativis.
Une di chês e je il cd “Lis Lotis dal Cormôr 1950 / Lis Cjançons dal Cormôr 2020”, dât fûr de Nota.

Sabide ai 21 chê pagjine impuartanone de storie dal Nûfcent in Friûl e tornarà a vignî ricuardade a Cjasielis, inte aree ex demaniâl di vie Ferraria 4, inte prime zornade de edizion di chest an de rassegne Festintenda, inmaneade dal circul Il Cantîr di Mortean.

Par iniziative de associazion Lidrîs Furlanis e cu la colaborazion di Radio Onde Furlane, a 6 sot sere e sarà une conference di Lorenzo Fabbro e Adriano Venturini, che a presentaran ancje il lôr documentari su lis Lotis dal Cormôr, intan che dopo cene e sarà protagoniste la  musiche dal vîf cun diviers dai artiscj che doi agns indaûr a vevin cjapât part ae realizazion dal cd. Un mosaic di sonoritâts e atmosferis jenfri rock, blues, pop, folk e cjançon d'autôr, cun Jacopo Casadio, Franco Giordani, Nicole Coceancig, Alessio Velliscig, Simone Piva, Guido Carrara, Prospettiva Rolaz e Devid Strussiat che a metaran dongje vôs e struments cuntun supergrup componût di  Emanuel Donadelli,Flavio Passon, Davide Sciacchitano e Leo Virgili. Conclusion de serade cul dj set di Moira B.