Di cualchi setemane incà il palinsest di Radio Onde Furlane al è ancjemò plui siôr. Cul cambi di stagjon la emitente e à slargjât ancjemò il so palinsest, zontant progjets gnûfs e pescjant fûr ancje alc di classic dal so archivi disconfinât.
La domenie a buinore a10.30 e il vinars dopomisdì a 4 e mieze, fint ai 6 di Fevrâr dal 2022, la programazion e propon Musica in Villa 2021 - in radio e in rêt. Ancje par chest an Onde Furlane al torne a proponi i concierts che si son tignûts dilunc dal Istât intal ambit de aromai “classiche” rassegne dedicade ae musiche dal vîf metude adun dal Progjet Integrât Culture dal Friûl di Mieç. 
DatiVibrati – Prima che tutto diventi folk, invezit, al salte fûr dal archivi de “radio libare dai furlans” e al torne a cjatâ spazi inte programazion. Di chê trasmission di cult, che e rimonte ai agns Nonante dal secul passât, curade di Michele Lamon, che le à rieditade pe ocasion, si tornaran a scoltâ ben cuarantetrê pontadis, il lunis e la domenie simpri a 5 sot sere.
Al è in plen davuelziment ancje 100 Brassens, un gnûf audiodocumentari in dîs pontadis (il Vinars dopomisdì a 3 la Domenie a buinore a 10), metût adun di Pauli Cantarut, di Toni Zogno e Francesca Valente, dedicât ae opare e ae personalitât di Georges Brassens, in ocasion dai doi inovâi “taronts” de sô nassite (cent agns indaûr) e de sô muart (ai 29 di Otubar dal 1981).