Une des personalitâts plui interessantis e par cierts viers mancul cognossudis dal Nûfcent furlan e je chê di Zuan Minut, sindicalist, ativist politic, poete, emigrant e imprenditôr.
Nassût a Visc intal 1895, al è stât un dai protagoniscj dal “Bieni Ros” inte Basse Furlane, cui siei comizis infogâts in lenghe furlane.
Al à pandût il so impegn politic e sociâl ancje Cuntune racuelte di poesiis, Rimis furlanis, publicade a Gurize intal 1921.
Intal 1923 al è stât “libar di scugnî lâ”, emigrant in Argjentine par vie dal spiçâ des violencis fassistis. Plui indenant al è lât in Uruguay, dulà che al à vivût fint al 1967.

A cincuantecinc agns de sô muart, inte suaze de Setemane de Culture Furlane promovude de Societât Filologjiche Furlane, il Centri interdipartimentâl pal disvilup de lenghe e de culture dal Friûl (Cirf) de Universitât dal Friûl al presente un incuintri dal titul Giovanni Minut. Tiere e Libertât dedicât propit ae figure di chel che al è stât definît “il predicjadôr furlan” (o “il predicjadôr socialist”) e ai diviers contescj storics e sociâls là che si è cjatât, des lotis contandinis e operariis dal Friûl ae gnove vite inte Americhe dal Sud.

Su chescj temis si confrontaran doi studiôs che, lant daûr des iniziativis pionieristichis, puartadis indenant ancjemò intai agns Setante dal secul stât di Renato Jacumin pe part storiche e politiche e di Renzo Faggin par chê leterarie, si son interessâts de figure di Minut: Ferruccio Tassin, che al è stât ancje curadôr intal 2017 di une gnove edizion de racuelte Rimis furlanis publicade de Filologjiche, e Federico Snaidero, insegnant e storic, autôr dal volum “Giovanni Minut. Terra e libertà”.
L'incuintri, coordenât di Marco Stolfo, colaboradôr dal Cirf e docent a contrat di Storie contemporanie e des comunicazions di masse intal Cors di lauree in Relazions publichis de Universitât dal Friûl, si tignarà inte Sale Florio di Palaç Florio (Vie Palladio 8, Udin) a 5 e mieze dopo di misdì.

Par altris informazions: CIRF - UniUd, vie Petracco 6, 33100 Udin; tel. 0432 556480; pueste eletroniche: cirf(at)uniud.it; www.cirf.uniud.it e www.facebook.com/UniUdparFurlan.