Si clame Snait. Ricercje e istruzion in Academie e al è un gnûf program televisîf dedicât al mont de ricercje intal nestri Ateneu. 
Al è un formât televisîf che, in plui pontadis e cuntun stîl divulgatîf, al conte ce che si intint cuant che si fevele di ricercje intai diviers setôrs sientifics e umanistics universitaris.
 
La iniziative e nas di une idee dal regjist Marco D’Agostini e dal Centri Interdipartimentâl pal Svilup de Lenghe e de Culture dal Friûl (CIRF), e tacant dai 17 di Mai e inricjìs la programazion televisive par furlan de Rai regjonâl, là che ogni mês e larà in onde une pontade dedicade aes diviersis realtâts dentri de Universitât dal Friûl. 

Tal prin episodi, in onde Martars ai 17 di Mai a 10 di sere e po ancje Vinars ai 20 di Mai a 9.20 di sere su RaiTre Bis (canâl 810), l’obietîf al è pontât sul Dipartiment di Siencis agroalimentârs, ambientâls e animâls.

Il professôr Enrico Peterlunger, coordenadôr dal grup di ricercje di Viticulture e enologjie, al fevelarà dal complès dai Riçs che al da acet a passe cinc mil studentis e students. Al contarà tal detai ancje di aspiets leâts aes ricercjis e ae didatiche tal setôr enologjic e vitivinicul: doi setôrs fondamentâi pe agriculture e pe economie dal Friûl.

Cun di plui, la zovine ricercjadore Elisa Pellegrini, vincidore di une borse di studi statâl intal 2021, e mostrarà la impuartance dai siei studis intal setôr des siencis ambientâls.

La trasmission e ven condusude di Serena Fogolini.

Il progjet, par cure de Associazion Lenghis dal Drâc, al ven metût adun cul jutori finanziari dal CIRF.