Lunis ai 9 di Otubar, a cuatri dopomisdì, inte Aule 3 (Aule Strassoldo) dal Pôl Economic Juridic dal Ateneu (in vie Tomadini 30 a Udin) si fasarà la proiezion dal cine di Laura Samani"Piccolo Corpo".

Il Centri interdipartimentâl pal svilup de lenghe e de culture dal Friûl (Cirf) dal Ateneu furlan al organize cheste proiezion speciâl inte ocasion de consegne dai atestâts dal cors concors pe certificazion di competence de lenghe furlane che e corispuint al nivel C2, inmaneât de Universitât dal Friûl e finanziât de ARLeF.

Il cors formatîf al durave 50 oris e a àn partecipât 48 corsiscj. I partecipants che a àn otignude la certificazion di competence de lenghe furlane di nivel C2 a saran sielzûts de ARLeF tant che certificadôrs pe costituzion des comissions di esam par assegnâ i nivei di cognossince de lenghe furlane, in atuazion dal Cuadri comun european di riferiment pes lenghis.

Ambientade in Friûl al inizi dal Nûfcent, la storie di Piccolo Corpo e scomence cun Agata, une zovine che e piert la fie a pene nassude. Daûr de tradizion catoliche, la anime de frute e je destinade a lâ tal Limbo. Agata e ven a savê di un puest su in mont dulà che si fasin tornâ in vite i frutins pal timp di un respîr, par batiâju e salvâ la lôr anime. Agata e scomence il viaç cul cuarp de frutine platât intune scjate e par strade e cjate Lince, un personaç solitari che si ufrìs di judâle. I doi a partissin par une aventure che ju puartarà a traviersâ dut il Friûl e a confrontâsi cul miracul.

Laura Samani si è diplomade in regjie tal Centri sperimentâl di cinematografie di Rome tal 2015. Tal 2016 e à zirât il curtmetraç La santa che dorme. Piccolo corpo al è il so prin luncmetraç e tal 2022 al à vinçût il Premi Flaiano pe miôr opare prime, tal stes an Laura Samani e à vinçût il David di Donatello tant che miôr regjiste esordiente.

Dopo de proiezion a saran dâts fûr i atestâts dal cors.

La partecipazion ae proiezion e je gratuite e e je vierte a dutis lis personis interessadis.