Ai 20 di Avrîl, inte sale Florio de Universitât dal Friûl, e je stade fate la presentazion uficiâl dai gnûfs struments didatics che a permetaran di inviâ la certificazion des competencis in lenghe furlane daûr di ce che e dispon la leç regjonâl 29/2007.

I trê volums a son stâts prontâts cul coordenament de professore Fabiana Fusco e a son il risultât dal lavôr plurienâl fat dal Ateneu furlan cu la poie dal Assessorât regjonâl pe Istruzion.

I libris a permetaran di preparâsi par jessi po valutâts rispiet ai nivei progressîfs di competence linguistiche (A, B e C), daûr des indicazions che si cjatin dal Cuadri comun european di riferiment pe cognossince des lenghis. 

La realizazion dai volums e je la prime part di un progjet strategjic di politiche linguistiche, puartât indenant dal Ateneu, che al larà dilunc cu la metude adun di diviers cors di formazion. Si tacarà in curt cu la formazion dai prins certificadôrs, che a varan di valutâ lis competencis linguistichis di cui che al domandarà di jessi certificât pes capacitâts di scolte, leture, conversazion, scriture e interazion par furlan. 

L'intindiment al è chel di rivâ a fâ i prins esams di certificazion fra la fin di chest an e il principi dal 2023.

La assessore regjonâl pe istruzion, Alessia Rosolen, e je intervignude marcant la impuartance dal plurilinguisim pe Regjon tant un valôr di fonde de sô autonomie e de sô specialitât e la rilevance des azions che a tocjin la certificazion linguistiche. Chest aspiet al  è stât ricuardât ancje dal president ARLeF, Eros Cisilino, inte prospetive dal disvilup plen e complet dal furlan tant che codiç di comunicazion bon par ducj i setôrs e in ducj i contescj.

La impuartance dal lavôr fat e di chel che si è daûr a fâ e j stade sotliniade ancje dal Retôr de Universitât dal Friûl, Roberto Pinton, intant che Enrico Perterlunger, delegât dal Retôr pe promozion de lenghe e de culture furlane e diretôr dal Cirf, al à pontât la sô atenzion su la funzion strategjiche de certificazion des competencis linguistichis tal cjamp de formazion in chel dai ûs publics de lenghe furlane e sul «rigôr sientific, su la precision e su la completece dal lavôr fat de professore Fabiana Fusco e dal grup di esperts che cun jê al sta daûr di chest progjet».
 
Peterlunger al à ancjemò zontât che chest al è un altri pas fondamentâl pe Universitât par fâ ce che i dîs di fâ al sô leç istitutive: contribuî pal progrès culturâl, sociâl e economic dal Friûl».