Events par furlan a Udin tal mês di Setembar
A Udin a van indenant ancje tal mês di Setembar i events dedicâts ae scuvierte de lenghe e de culture furlane.
Al ven, al ven...
02/09 - 18:00
Biblioteche Civiche “V. Joppi”, Sale Maniacco
Une conversazion a traviers de storie dai dizionaris furlans, dal Vocabolario friulano di Jacum Pirone, al dizionari in linie https://dizionarifurlan.eu/ di Sandri Carrozzo.
Par cure de Biblioteche Civiche “V. Joppi”
Mistîrs, Sants e Striis
04/09 - 19:00
Parc Lord Baden Powell
Un spetacul di storytelling dedicât ae valorizazion de culture, de lenghe e tradizion furlane, cu la narazion di Sonia Cossettini, l'acompagnament musicâl di Michele Pucci e la performance cul fûc di Cecilia Rachele Qualla.
Par cure di La Compagnia dei Riservati
Tant che une gote di aghe que cruzò el océano
04/09 - 20:30
Cort di Palaç Morpurgo
Un viaç al contrari des tieris di migrazion al Friûl. Cjançons, letaris, ricuarts e futûr da la emigrazion furlane in Uruguay e Argjentine intun conciert recitât ideât e firmât di Maurizio Mattiuzza, Carlotta Del Bianco e Alvise Nodale.
Par cure di Spazio a Colori associazione e Ufici pe Lenghe Furlane
L'aghe dapît la cleve. Conte di amôr
05/09 - 18:00
Biblioteche Civiche “V. Joppi”, Sale Maniacco
Presentazion de gnove edizion dal romanç di Dino Virgjili, publicât de Societât Filologjiche Furlane in grafie uficiâl par cure di Davide Turello. Walter Tomada al dialoghe cul curadôr.
Il prin romanç par furlan, une opare mestre ancjemò insuperade de narazion furlane, L’aghe dapît la cleve al è stât tornât a publicâ dopo 75 agns te grafie normalizade par cure di Davide Turello.
E dai 11 ai 14... apontament speciâl cun FURLAN DOC, la vetrine de lenghe furlane a Friuli Doc!