Une mostre e une cunvigne par ricuardâ i 40 agns de Universitât dal Friûl

In ocasion dai 40 agns dal inviament dai prins cors di lauree, il CIRF de Universitât dal Friûl al à prontât un apontament dopli par ricuardâ chês che a son stadis lis bataiis par vê un Ateneu logât a Udin. Ai 10 di Mai, cun di fat, te suaze de Setemane de Culture Furlane e di Vicino/Lontano, a son in program la scree de mostre “Nascita di un Ateneo. Dal terremoto una tenda per il futuro”, e la cunvigne “Par un Ateneu furlan. I cuarante agns de Universitât dal Friûl”. Fin ai 25 di Mai, duncje, te jentrade di Palaç Antonini si podaran viodi i panei che a ricostruissin il percors de racuelte di firmis pe istituzion di une Universitât autonome, cun fotografiis e tescj metûts adun dal delegât dal Retôr pe Culture, Francesco Nazzi, che a saran insiorâts di strissons e manifescj de epoche. La conference si fasarà in sale Roberto Gusmani, a lis 5 dopomisdì, cun relatôrs, in plui dal curadôr de mostre, il professôr emerit Franco Frilli, za Retôr dal Ateneu di Udin dal 1983 al 1992 e l’ex senatôr Diego Carpenedo, in chê volte conseîr regjonâl e partidant salt e atîf pe ricostruzion dal Friûl.