Ancje par chest an il Centri Interdipartimentâl pal Svilup de Lenghe e de Culture dal Friûl (CIRF) de Universitât dal Friûl al inmanee un cors gratuit di lenghe e culture furlane pai students dal Ateneu e par ducj i zovins interessâts a cognossi miôr la ricjece de nestre tiere, sedi a nivel linguistic, sedi par chel che al tocje la storie, lis tradizions e il teritori.
 
La prime lezion si fasarà ai 5 di Setembar dal 2023 e si larà indenant ducj i martars e lis joibis, des 2 e mieze aes 5 e mieze daspò misdì, e i vinars des 9 e mieze di buinore a misdì e mieç, fin ai 29 di Setembar, par un totâl di 30 oris.

Il cors al è sore nuie e si tignarà in linie, su plateforme informatiche Microsoft Teams. 

Il program al previôt elements di fonde di grafie e di gramatiche de lenghe furlane, adun cun nozions di culture e di storie dal Friûl.

Cun di plui, vie pes lezions a vignaran presentâts ancje i ents plui impuartants che a son impegnâts, ognidun daûr de sô specificitât istituzionâl e organizative, pe promozion de lenghe furlane e de culture dal Friûl, ven a stâi:

• la Agjenzie regjonâl pe lenghe furlane (ARLeF);
• la Societât Filologjiche Furlane;
• la Cooperative Informazione Friulana/Radio Onde Furlane,

che a colaborin ae iniziative e che a vierzaran ancje lis puartis des lôr sedis par une visite vuidade.

A ducj i iscrits ur vignarà dât un atestât di partecipazion. Pai fantats des superiôrs e je la pussibilitât di vê il ricognossiment dai credits formatîfs pe ativitât extrascolastiche.

Par vê informazions e par notâsi si pues clamâ il CIRF al numar 0432 556480 o ben mandâ un messaç di pueste eletroniche a sportel.furlan(at)uniud.it e cirf(at)uniud.it

Si pues ancje discjamâ il modul culì sot, jemplâlu e mandâlu par pueste eletroniche a sportel.furlan(at)uniud.it e cirf(at)uniud.it