Lis gnovis dal Cirf

La Fieste de Patrie inte Universitât dal Friûl. Cine furlan, atestâts di frecuence e resonaments su lenghe, storie, atualitât e avignî

L'event inmaneât dal Cirf ai 4 di Avrîl stâts al mantignût lis promessis de vilie. E je stade une biele ocasion par dâsi dongje, par memoreâ cun cussience la Fieste de Patrie dal Friûl, par consegnâ ai corsiscj i atestâts di partecipazion ai cors di lenghe furlane inmaneâts dal Cirf intai agns 2020 e 2021, par cjalâ sul schermi grant il cine di Massimo Garlatti-Costa "Predis. La nazione negata" e par fâ cualchi resonament in cont de storie, de atualitât e de produzion culturâl e artistiche in lenghe furlane.

L'apontament, che si à davuelt inte Aule 3 (Sale Strassoldo) dal Pôl Economic-Juridic dal Ateneu (Vie Tomadini 30, Udin), al è stât introdusût dal diretôr dal Cirf, Enrico Peterlunger, e dai intervents di salût de assessore pe istruzion dal Comun di Udin, Elisabetta Marioni, dal president de ARLeF, Eros Cisilino, e di pre Romano Michelotti, Flavio Pressacco e geremia Gomboso, presidents des associazions Glesie Furlane, Gilberto Pressacco e Istitût Ladin-Furlan Pre Checo Placerean.

Il cûr dal incuintri e je stade la proiezion di “Predis. La nazione negata”, ildocumentari che al conte la storie e lis ideis di pre Josef Marchet, pre Checo Placerean e pre Antoni Beline, trê predis che dilunc vie dal Nûfcent a àn dedicât la lôr vite al Friûl e ae sô int, cul studiâ e cul insegnâ la sô storie, cul promovi la sô lenghe e la sô culture e, soredut, cuntun impegn cussient e costant a pro dal ricognossiment di lenghe, identitât e e dirits.

La vision dal cine - une opare che e colpìs i voi, il cûr e il cerviel di ducj chei che lu cjalin - e je stade compagnade di un dialic cul so autôr, puartât indenant di Marco Stolfo, colaboradôr dal Cirf e docent a contrat di Storie contemporanie e des comunicazions di masse intal Cors di lauree in Relazions publichis de Universitât di Udin, che al à tocjât i contignûts dal cine e di chês altris oparis di Garlatti-Costa e po la sô esperience di regjist e produtôr, disvilupade jenfri Friûl, Italie, Ingletiere e Gales. 

In conclusion e je stade fate la consegne dai atestâts ai arlêfs dai cors di lenghe furlane inmaneâts dal Cirf vie pai agns 2020 e 2021, che a àn podût jessi presints pe ocasion.

 

 

Indaûr