Cors gratuits di furlan pai dipendents publics

Cors gratuits di furlan par miorâ lis relazions dal Ateneu e di chei altris Ents cul teritori e cui utents. Viodût l’interès stiçât des edizions passadis dai cors di furlan pai dipendents de Aministrazion Publiche, il Centri Interdipartimentâl pal svilup de lenghe e de culture dal Friûl (CIRF) de Universitât dal Friûl, al à chê di organizâ ancjemò trê côrs sore nuie par miorâ lis relazions dai Ents Locâi cul teritori e cui citadins. Tal mês di Otubar dal 2017 al tacarà un gnûf cicli di incuintris, cun programs di nivel di fonde, intermedi, avanzât. La ativitât formative e varà une durade di 30 oris, dividudis in 12 lezions che si davuelzaran in aulis dal pôl umanistic dal Ateneu di Udin. Ai corsiscj che a passaran l’esam finâl e che a varan frecuentât almancul l’80% des oris ur vignarà dât un atestât di frecuence cun merit. Za de prime lezion e sarà regalade a ogni iscrit une copie gratuite dal manuâl “La grafie uficiâl de lenghe furlane”, publicât de ARLeF tal 2016. Altri materiâl didatic al sarà dât fûr tai incuintris seguitîfs, stant aes indicazions dal docent. La iniziative, che e je metude in vore in gracie de leç 482 dai 15 di Dicembar dal 1999 (pe tutele des minorancis linguistichis storichis), e rapresente un strument zovevul par chei che a lavorin intun Ent Public tal teritori furlanofon e a àn voie di miorâ lis lôr competencis linguistichis e il contat cui utents. Cun di plui, cheste iniziative e rispuint aes indicazions de L. R. 29/2007, che e previôt di doprâ la lenghe furlane tai Ents Publics e tes societâts di servizis ae popolazion. Par altris informazions si pues contatâ la segretarie organizative dal CIRF ai numars 0432 - 556480/556484 o pûr midiant di pueste eletroniche: cirf@uniud.it (segretarie del CIRF) o a caterina.rossi@uniud.it (tutor).