Il Consei Diretîf dal CIRF al à di pôc designât i membris dal gnûf Comitât Sientific (deliberazion dai 23 di Mai dal 2017, fate buine cun D. R. n. 333 dai 15 di Jugn dal 2017), che al judarà il Diretîf a meti in vore progjets e propuestis pe valorizazion dal Centri Interdipartimentâl pal svilup de lenghe e de culture dal Friûl.
Ve ca i nominatîfs dai components, apartignints a diviers cjamps dal savê e dal mont de comunicazion:

Pauli Cantarut, president de cooperative "Informazion Furlane";

Claudio Cressati, professôr associât di Storie des dutrinis politichis ae Universitât dal Friûl e coordenadôr sientific dal Modul Jean Monnet in Multilinguisim, citadinance multiculturâl e integrazion europeane;

Gian Paolo Gri, antropolic e studiôs di storie e culture furlane, za docent di Antropologjie culturâl ae Universitât dal Friûl;

Mauro Pascolini, professôr ordenari di Gjeografie ae Universitât dal Friûl e delegât di setôr pal Teritori e Coregjonâi tal forest;

Federico Vicario, professôr associât di Glotologjie e Linguistiche ae Universitât dal Friûl e President de Societât Filologjiche Furlane.
 

Daûr des indicazions dal Consei Diretîf, i lavôrs dal Comitât Sientific a saran coordenâts dal diretôr dal CIRF, professôr Enrico Peterlunger.
L’obietîf primari dal gnûf Orghin al sarà chel di rinfuarçâ la posizion dal CIRF dentri dal Ateneu, di mût di rindilu plui partecip aes ativitâts e ai events inmaneâts de Universitât, cuntun voli di rivuart soredut ai students e docents, valorizant lis ricercjis e i studis cun ricjadudis sul teritori. Cun di plui, viodût il contat cul mont academic, il Centri Interdipartimentâl al podarà deventâ un osservatori privilegjât su la culture dal Friûl, scrutinant lis tindincis in vore e misurant il stât di salût de lenghe e de identitât furlane.
In sumis, il CIRF si prepare a dâ di gnûf vôs ae Universitât. Une vôs cu lis tonalitâts vivarosis e musicâls de nestre marilenghe furlane.