Par sierâ il 2018 in compagnie, il CIRF al à pensât di inmaneâ un incuintri cun ducj i corsiscj  che  a  àn  frecuentât  i  cors  di  lenghe  e  culture  furlane  vie  pal  an,  di  mût  di consegnâur  i  atestâts  e,  cun  di  plui,  di  vê  la  pussibilitât  di  cognossi  cualchidune  des ecelencis artistichis dal teritori. La idee e je nassude l’an passât, cuant che, in ocasion de cerimonie conclusive dai percors di formazion, al jere stât invidât Doro Gjat, innomenât cjantant rap cjargnel. Chest an, invezit, si passe de art musicâl a chê grafiche: ospit di vinars ai 21 di Dicembar, a 3 e mieze daspò misdì, te Aule 2 di Palaç Antonini, di fat, al sarà  il  fumetist  Luca  Malisan,  protagonist  di  une  des  pontadis  de  seconde  serie  dai documentaris INT/ART, un progjet di Agherose dedicât ai zovins artiscj dal teritori, cu la  regjie  di  Dorino  Minigutti  e  cul  contribût  de  ARLeF  e  dal  Fonts  Regjonâl  pal Audiovisîf. Te interviste par cure di Radio Onde Furlane, il dissegnadôr nus contarà la sô storie e nus darà cualchi cerce dai siei lavôrs. 
Dongje dai atestâts dai cors par dipendents de Aministrazion Publiche finanziâts de Leç 482/1999, a saran dâts fûr ancje chei dai cors estîfs pai zovins e pai students de Universitât dal  Friûl  patrocinâts  de  ARLeF  –  Agjenzie  Regjonâl  pe  Lenghe  Furlane,  de  Societât Filologjiche Furlane e cun Radio Onde Furlane tant che media partner.