Ancje par chest an il Centri interdipartimentâl pal svilup de lenghe e de culture dal Friûl (Cirf) dal Ateneu furlan al memoree la Fieste de Patrie dal Friûl. L'inovâl de assegnazion, ai 3 di Avrîl dal 1077, de bande dal imperadôr Indrì IV, dal podê temporâl al patriarcje di Aquilee Siart, che al à compuartât la trasformazion dal Patriarcjât intun «stât» autonom inte suaze dal Sacri Imperi Roman Gjermanic, di aromai cuasi mieç secul al è une ocasion par fâ fieste in non di une identitât unitarie, plurâl e dinamiche di vivi ogni dì cun cussience e cence prejudizis. Propit cun chest spirt pe celebrazion de Fieste de Patrie de bande de Universitât dal Friûl al vignarà inmaneât un event che in chel istès al tocje la storie e la produzion culturâl e artistiche contemporanie in lenghe furlane.

Lunis ai 4 di Avrîl, a cinc e mieze sot sere, lì de Aule 3 (Sale Strassoldo) dal Pôl Economic-Juridic dal Ateneu (Vie Tomadini 30, Udin) si fasarà la proiezion dal cine di Massimo Garlatti-Costa"Predis. La nazione negata". Al è un documentari dedicât a pre Josef Marchet, pre Checo Placerean e pre Antoni Beline, trê predis che dilunc vie dal Nûfcent a àn dedicât la lôr vite al Friûl e ae sô int, cul studiâ e cul insegnâ la sô storie, cul promovi la sô lenghe e la sô culture e, soredut, cuntun impegn cussient e costant a pro dal ricognossiment di lenghe, identitât e e dirits.

“Predis”, produsût di Raja Films e Belka Media e metût adun intal 2019 cul jutori di ARLeF (Agjenzie Regjonâl pe Lenghe Furlane), Fonts Regjonâl pal Audiovisîf F-VG, Film Comission F-VG e Glesie Furlane, al è il secont cjapitul di une trilogjie dedicade ae storie contemporanie dal Friûl e in particolâr ai furlans che a àn lotât pe lôr identitât, pe lôr lenghe e pai lôr dirits. In particolâr al è il ' prequel' di “Missus. L'ultima battaglia”, il prin cjapitul de serie, fat di Garlatti-Costa intal 2017, dedicât ae bataie puartade indenant dai predis de associazion Glesie Furlane pal ricognossiment e pal esercizi dal dirit di doprâ la lenghe furlane inte liturgjie e in ambit eclesiastic. La trilogjie si sierarà cuntun tierç cine, che al è ancjemò in vore, che al aprofondìs il teme de impuartance dal ûs de lenghe proprie de bande di ogni individui.

Massimo Garlatti-Costa si à formât tra Italie e Ream Unît, frecuentant la scuele Ipotesi Cinema di Ermanno Olmi, studiant a Sheffield par un Master in regjie e senegjature e lavorant in Gales e in Ingletiere. Di plui di vincj agns al è un dai senegjatôrs e regjiscj furlans plui prolifics e preseâts.
L'autôr al sarà presint ae proiezion, che e sarà introdusude dal diretôr dal Cirf, Enrico Peterlunger, e di un dialic tra il stes Garlatti-Costa e Marco Stolfo, colaboradôr dal Cirf e docent a contrat di Storie contemporanie e des comunicazions di masse intal Cors di lauree in Relazions publichis de Universitât di Udin.

In ocasion dal event a vignaran consegnâts ai corsiscj i atestâts di partecipazion ai cors di lenghe furlane inmaneâts dal Cirf intai agns 2020 e 2021.

La partecipazion ae iniziative e je libare e sore nuie. In osservance des normis sanitarie, a coventin il certificât vert di base e la mascarute Ffp2.

Par altris informazions: Cirf, via Petracco 6, 33100 Udine; tel. 0432 556480; e-mail: cirf(at)uniud.it; cirf.uniud.it e www.facebook.com/UniUdparFurlan.