Chê dai 2 di Dicembar, massime par chest an, e je une zornade di fieste ancje par noaltris dal CIRF. Cun di fat, juste in chê dì al finìs cent agns il professôr Nereo Perini, che al à fat pardabon cetant inte sô vite pe culture, pe istruzion e pe lenghe de sô int e ancje pe Universitât dal Friûl.

Furlan di Dartigne, laureât in lenghis e leteraturis forestis te Universitât di Vignesie Ca’ Foscari, al è stât professôr di francês in diviersis scuelis mediis e superiôrs di Udin e po ancje vicepreside e preside dal Istitût tecnic 'A. Zanon'.
In ocasion dal inviament de Scuele medie unificade, tal 1962, al è stât un dai colaboradôrs plui preseâts dal Ministeri de istruzion publiche, une vore impegnât propit inte azion di promozion e di inzornament de ativitât didatiche.

Al è stât un dai pionîrs, dentri dal Stât talian, de didatiche des lenghis modernis. A cheste dissipline, intai siei aspiets teorics e pratics, al à dedicât un grum di studis, di ricercjis e di publicazions, tacant di chel innomenât manuâl, jessût tal 1968, cul titul di Elementi di glottodidattica.
In chei agns al jentre inte universitât, prime tant che assistent de catedre di Lenghe e leterature francese inte sede di Udin de Universitât di Triest e po tant che titolâr dal insegnament di Didatiche des lenghis modernis.

In chê che dome tal 1978 e deventarà une des facoltâts de gnove Universitât dal Friûl al invie daurman, tacant dai prins agns Setante dal secul stât, une ativitât preseose di formazion e di inzornament dai insegnants di lenghis (lenghis forestis e talian tant che lenghe seconde, ma ancje lenghis in cundizion di minorance, tacant dal furlan e dal sloven di chenti). 
Tal 1974 al mole in maniere definitive il so impegn di preside dal “Zanon” e si dediche ad in plen ae Universitât, cjapant sù la incarghe di Diretôr dal Istitût di Pedagogjie e Didatiche des Lenghis Modernis, dal 1974 al 1977, inviant il CLAV (Centri Linguistic Audiovisîfs, che cumò al è deventât CLA), che di chel al è stât ancje diretôr, e il CIRD (Centri Interdipartimentâl di Ricercje Didatiche) e plui indenant cjapant part ae creazion dal Centri Internazionâl sul Plurilinguisim, ancjemò in vore al dì di vuê.

Il so grup di lavôr, dilunc vie dai agns Otante e Nonante dal secul stât, al à metût adun cetancj progjets pilote di educazion bilengâl furlan-talian e sloven-talian tes scuelis de infanzie de Provincie di Udin, e ancjetancj materiâi didatics, ancje in colaborazion cu lis istituzions europeanis e cun scritôrs, artiscj, musiciscj, regjiscj e atôrs di ogni dontri, tacant dai “nostrans” Francesco Tullio Altan, Amedeo Giacomini, Leo Zanier, Renato Calligaro, Giancarlo Velliscig e Dorino Minigutti.

Tancj di chei materiâi didatics, dâts fûr de cjase editore KappaVu, si ju cjate propit inte biblioteche dal CIRF e si pues preseâ ancjemò in dì di vuê la lôr cualitât e la lôr atualitât.
La Didatiche des Lenghis Modernis dal nestri Ateneu e à simpri vût rapuarts continuis cun centris di ricercje talians e forescj e cu lis sociis che a lavorin tai cjamps de linguistiche e de linguistiche aplicade soredut tal insegnament des lenghis e de formazion dai insegnants.

Il professôr Perini al è stât un component de SIG (Societât Taliane di Glotologjie), de SLI (Societât di Linguistiche Taliane) e de ANILS ( Associazion Taliane dai Insegnants di Lenghis Forestis).
Al à fat cetantis esperiencis tal forest, in Ingletiere, in France e po, dopo lât in pension, fintremai in Canadà, là che al à lavorât pal (e sul) furlan inte Universitât di Toronto, cun riferiment aes diviersis gjenerazions de comunitât furlane di lenti là.

Par dut ce che al à fat – che chi o vin dome che strucât in maniere parziâl – e par dut ce che che nus à insegnât a fâ, i disìn “graciis” al professôr Perini e i fasìn tancj augurons di cûr.