Sabide ai 3 di Dicembar a 4 dopo di misdì, inte Vile Dora a San Zorç di Noiâr e je stade fate la cerimonie di premiazion e je stade fate la premiazion de cuinte edizion di Vôs de Basse, il concors leterari in lenghe furlane inmaneât dai Comuns di Cjarlins, Gonârs, Muçane, Porpêt, Prissinins e San Zorç di Noiâr, midiant dal Sportel Associât pe Lenghe Furlane e cul patrocini de Societât Filologjiche Furlane e de Cooperative Informazione Friulana / Radio Onde Furlane.

Il dopomisdì dedicât ae scriture creative e ae produzion culturâl par furlan si à viert cul spetacul Fantasie un Corno! di e cun Emanuele Bertossi e cu lis musichis di Paolo Forte, nassût inte suaze dal progjet regjonâl Fiume in corso cun chê di valorizâ il patrimoni fluviâl dal teritori.

A vinci la sezion Students, dedicade a Gina Marpillero tai 110 agns de nassite, a son stâts Francesco Moletta (scuele secondarie di 1n grât “Italo Svevo” di Vildivar, 3° premi), cun docente la professore Meri Broi; la scuele primarie “Guglielmo Marconi” di Rivis Darcjan (2° premi) e la scuele secondarie di 1n grât “Pellegrino da San Daniele” di San Denêl (1n premi), dutis dôs cun docente Donatella Bello.

Il premi pe sezion Traduzion al è lât a Noemi Lilian Salva, dal Fogolâr Furlan di Buenos Aires (Argjentine), biel che une segnalazion pe sezion Poesie e je rivade fintremai a Madrid (Spagne), pe poesie Cence di me di Francesco Chiavon. I vincidôrs di cheste sezion a son stâts Chiara Savorgnan (Basilian, 3ç premi), Aldo Rossi (Reane, 2nt premi) e Egle Taverna (Gurize, 1n premi). Dutis lis poesiis a son stadis metudis in musiche di bande dal fisarmonicist Paolo Forte.
La sezion Narative, invezit, e je stade vinçude di Gianluca Franco (Caprive, 3ç premi), Rudy Citossi (Muçane, 2nt premi) e Gianfranco Pellegrini (Reane,1n premi).