E je vierte la otave edizion dal concors leterari in lenghe furlane “Vôs de Basse”, inmaneât dai Comuns di Cjarlins, Gonârs, Muçane, Porpêt, Prissinins e San Zorç di Noiâr, midiant dal Sportel associât pe lenghe furlane e cul patrocini de Societât Filologjiche Furlane e de Cooperative Informazione Friulana / Radio Onde Furlane.

La iniziative, che si partecipe sore nuie e che e je pensade par stiçâ la int a scrivi par furlan, e vûl ancje jessi un omaç a cualchidune des figuris che a àn insiorât il panorame culturâl de Basse furlane, tant che pre Zaneto, Tita Marzuttini, Gina Marpillero, Luciano Morandini, Alviero Negro e Pierluigi Visintin.

Par cirî di dâur vôs a dutis lis diviersis espressions, il bant al previôt cuatri diviersis sezions:

1. narative (contis curtis e tescj teatrâi),
2. poesie,
3. traduzion 
4. students de scuele primarie.

Viodude la largje partecipazion des edizions passadis, ancje dal forest, in plui de consegne dai lavôrs su cjarte li dal ufici protocol dal Comun di San Zorç di Noiâr, e je previodude la pussibilitât di mandâ i lavôrs in formât digjitâl ae PEC:  comune.sangiorgiodinogaro@certgov.fvg.it. Il bant al scjât a misdì e mieç di lunis ai 26 di Zenâr dal 2026. Une jurie di esperts e stazarà lis oparis e e nomenarà i vincidôrs di ogni sezion, che a varan par premi un bon di spindi par comprâ libris. Par informazions si pues clamâ il numar 0431620281 o scrivi a: sportel.furlan@bassefurlane.eu. Cun di plui, cui che al à gust al pues ancje lâ li de biblioteche comunâl “Vile Dora” di San Zorç di Noiâr e domandâ sore nuie lis publicazions cui vincidôrs des edizions passadis.

Il bant si siere aes 12,30 di lunis ai 26 di Zenâr dal 2026