Ai 9 di Mai stâts e je stade screade la Conference sul avignî de Europe, inmaneade de Union Europeane. 
Dai 31 di Mai ae fin dal mês di Jugn, par iniziative dal Centri di documentazion europeane 'G. Commessatti' dal nestri Ateneu, cu la colaborazion de cooperative Informazione Friulana e cul jutori de Rapresentance in Italie de Comission Europeane, al ven metût in vore il progjet  La Conferenza sul futuro dell'Europa. Un nuovo slancio per la democrazia europea: cinc trasmissions su Radio Onde Furlane e trê incuintris in rêt par meti adun riflessions, cognossincis, ideis e propuestis pal nestri avignî di citadins europeans.

Il percors radiofonic, dal titul Europe in Divignî, al scomence lunis ai 31 di Mai aes 8.30 su lis frecuencis di Radio Onde Furlane (sui 90 Mhz, sui 90.2 Mhz e in streaming ae direzion www.radioondefurlane.eu). La pontade di scree e sarà riproponude in repliche martars al 1° Jugn aes 13.30 e miercus ai 2 di Jugn aes 17.30). Chei altris apontaments a son programâts intes setemanis dopo, lant daûr dal stes scheme: lunis ai 7 di Jugn aes 8.30 (cun replichis martars ai 8 aes 13.30 e miercus ai 9 aes 17.30); lunis ai 14 di Jugn aes 8.30 (cun replichis martars ai 15 aes 13.30 e miercus ai 16 aes 17.30); lunis ai 21 di Jugn aes 8.30 (cun replichis martars ai 22 aes 13.30 e miercus ai 23 aes 17.30), e lunis ai 28 di Jugn aes 8.30 (cun replichis martars ai 29 aes 13.30 e miercus ai 30 aes 17.30). Dutis lis trasmissions a saran a disposizion in podcast.

Il prin incuintri on line, "Il futuro è nelle tue mani. Fai sentire la tua voce". L'Europa dei giovani, al sarà joibe ai 3 di Jugn, des 11.30 aes 13.00. Protagoniscj principâi i fantats di dôs classis tiercis (Gjeometris e Costruzions Ambient Teritori) dal ISIS Magrini Marchetti di Glemone che cul coordenament dal lôr insegnant di storie e talian, Agnul Floramo, a presentaran riflessions e propuestis, dialogant cui coetanis de classe 3 A Linguistic/EsaBac dal Liceu Percoto di Udin, coordenâts dal insegnant di francese Claudia Malisano, e confrontantsi cun Claudio Cressati, docent di Storie des dotrinis politichis e responsabil sientific dal Centri di documentazion europeane 'G. Commessatti' dal Ateneu furlan, cun Francesco Deana, docent di Dirit de Union europeane de Universitât dai studis di Udin, e Daniela Cattalini, documentaliste responsabie dal Centri di documentazion europeane di Udin.

Intes setemanis seguitivis si tignaran chei altris doi events de serie "Il futuro è nelle tue mani. Fai sentire la tua voce", dedicâts un ae Europe dai dirits e chel altri ae Europe dai citadins, cu la partecipazion di esperts dal Ateneu furlan e di esponents dal associazionisim locâl.