Il progjet La Conferenza sul futuro dell'Europa. Un nuovo slancio per la democrazia europea, metût adun dal Centri di documentazion europeane 'G. Commessatti' dal nestri Ateneu, cu la colaborazion de cooperative Informazione Friulana e cul jutori de Rapresentance in Italie de Comission Europeane, al va dilunc par dut il mês di Jugn.

Vie par cheste setemane e je in programazion la seconde pontade de trasmission radiofoniche Europe in Divignî, cui intervents di Roberto Castaldi dal Cesue, di Angelo Floramo dal ISIS Magrini Marchetti e di Alessia-Ottavia Cozzi dal Dipartiment di Siencis Juridichis dal nestri Ateneu, e l'event de serie  "Il futuro è nelle tue mani. Fai sentire la tua voce", dedicât ae Europe dai dirits, che si davuelç ai 10 di Jugn a 3 e mieze dopo di misdì su la plateforme Teams.

Il teme de citadinance europeane e dai dirits inte Union Europeane al vignarà frontât di Claudio Cressati, docent di Storie des dotrinis politichis dal Dipartiment di Siencis Juridichis e responsabil sientific dal Centri di documentazion europeane 'G. Commessatti', e des juristis de Universitât dal Friûl Elisabetta Bergamini e Alessia-Ottavia Cozzi, intant che Daniela Cattalini, documentaliste responsabile dal Cde e varà il compit di presentâ il funzionament de plateforme web che midiant di chê si pues partecipâ ae Conference sul avignî de Europe, presentant propuestis, indicazions e sugjeriments par progjetâ la Europe che e sarà e lis sôs istituzions e par potenziâ e disvilupâ la sô unitât politiche. 

Il percors radiofonic, dal titul Europe in Divignî, al va di lunc su lis frecuencis di Radio Onde Furlane (sui 90 Mhz, sui 90.2 Mhz e in streaming ae direzion www.radioondefurlane.eu). La pontade di cheste setemane, dopo de prime emission di lunis ai 7 di Jugn a 8.30 a buinore e torne in onde vuê, martars ai 8 a une mieze dopo di misdì,e doman, miercus ai 9, a 5 e mieze sot sere. I apontaments seguitîfs a son chei di lunis ai 14 di Jugn a 8.30 a buinore cun replichis martars ai 15 (h. 13.30) e miercus ai 16 (h. 17.30), lunis ai 21 di Jugn a 8.30 a buinore cun replichis martars ai 22 (h. 13.30) e miercus ai 23 (h. 17.30) e lunis ai 28 di Jugn aes 8.30 a buinore cun replichis martars ai 29 (h. 13.30) e miercus ai 30 (h. 17.30). Dutis lis trasmissions a saran a disposizion in podcast.

La serie  "Il futuro è nelle tue mani. Fai sentire la tua voce". L'Europa dei giovani si sierarà ai 24 di Jugn cuntun incuintri dedicât ae Europe dai dirits cu la partecipazion di esperts dal Ateneu furlan e di esponents dal associazionisim locâl.