Dopo il sucès de prime cul dut esaurît tal Teatri Gnûf “Giovanni da Udine” de “La Cjase. Lagrimis di aiar e soreli”, prime produzion dal Teatri Stabil Furlan, la opare ispirade al drame “La casa” dal poete cjargnel Siro Angeli e torne cjase, a Cesclans di Cjavaç, là che il scritôr, dramaturc e senegjatôr al jere nassût.

La pièce furlane, tirade fûr de opare “La casa” dal 1937, prin lavôr de cussì clamade Trilogjie cjargnele, e sarà l’event plui impuartant vie pai trê dìs che il Comun di Cjavaç al dediche al grant artist e paisan, inte suaze di une iniziative dal titul “Siro Angeli. Posso affermare che esisto” che si davuelzarà tra Tumieç, Cesclans e Cjavaç ai 21, 22 e 28 di Avost.

La opare e larà in sene domenie ai 22 di Avost aes 6 e mieze sot sere, propit te zornade dal aniversari dai 30 agns de muart dal autôr, ai 22 di Avost dal 1991. Al sarà un viaç tes profonditâts dai ambients naturâi di Angeli, fate a tapis, tra i curtii, la cjase dulà che al è nassût e lis stradis dal borc, fintremai la plêf di Sant Stiefin che e domine la crete sore il lât di Cjavaç.

Par vê plui informazions e par notâsi al spetacul si pues clamâ la segretarie dal Comun di Cjavaç al numar 0433 487400 o ben consultâ la pagjine web www.comune.cavazzocarnico.ud.it.