Lis gnovis dal Sportel
Al torne il concors di poesie in lenghe taliane e furlane "Nelso Tracanelli"
Al torne il concors di poesie in lenghe taliane e furlane "Nelso Tracanelli", inmaneât dal Comun di San Michêl dal Tiliment e rivât ae edizion numar dîs.
La novitât di chest an e je la propueste di un teme par indreçâ i autôrs: Nella bassa, di là dal fiume - Jù pa la bassa, di là da l’aga.
Il Comun di San Michêl dal Tiliment, in colaborazion cu la Associazion “La Bassa” di Tisane, la Societât Filologjiche Furlane “G.I. Ascoli” di Udin, la ARLeF (Agjenzie Regjonâl pe Lenghe Furlane) il CIRF de Universitât dal Friûl e il Centro Studi Pier Paolo Pasolini di Cjasarse, cul fin di ricuardâ la figure e la opare di Nelso Tracanelli (1934-2002), poete, scritôr e studiôs de culture furlane di San Michêl, e di valorizâ la culture furlane locâl e la produzion leterarie in gjenerâl, al bandìs la decime edizion dal concors leterari che i è intitulât, in lenghe furlane e in lenghe taliane.
Il concors al à dôs sezions:
- sezion di poesie in lenghe furlane (in cualsisei variante locâl, sedi interne che esterne al Friûl storic, cjapant dentri lis comunitâts vie pal mont);
- sezion di poesie in lenghe taliane.
Il teme de edizion numar dîs, par dutis dôs lis sezions, al è: Nella bassa, di là del fiume – Jù pa la bassa, di là da l’aga.
Par ogni sezion i concorints a puedin presentâ no plui di 3 oparis, e ogni poesie e à di vê no plui di 30 viers.
Scjadince
Ducj i materiâi, trasmetûts cun cualsisei mieç (a man, par pueste ordenarie. par pueste eletroniche), a àn di rivâ ae segretarie dentri des 12.00 di lunis ai 15 di Mai dal 2023.
Dome pai lavôrs spedîts par racomandade e fâs fede la date de spedizion.
Bant complet e modulistiche
Si invide a lei il bat complet cun dentri il regolament e lis modalitâts di iscrizion par partecipâ ae decime edizion dal Premi leterari bienâl "Nelso Tracanelli".
Il bant dal concors cul modul di iscrizion si puedin discjamâ in formât PDF plui sot in cheste pagjine te sezion File correlati.
Par informazions contatâ la Biblioteche Comunâl “Nelso Tracanelli” di San Michêl dal Tiliment, place de Libertât, n. 1, tel. 0431.516100, pueste eletroniche: biblioteca(at)comunesanmichele.it o pûr eventi.culturali(at)comunesanmichele.it; sît internet dal Comun: www.comunesanmichele.it.
