Lis gnovis dal Sportel

Premi San Simon 2024

Al è vignût fûr il bant di concors pe 45esime edizion dal premi leterari in lenghe furlane “San Simon”

La Citât di Codroip, in colaborazion cu la Agjenzie Regjonâl pe Lenghe Furlane (ARLeF), la Societât Filologjiche Furlane, l’Istitût Ladin Furlan
Pre Checo Placerean, l’Ent Friûl tal Mont e il PAFF, Palaç Arts Fumet Friûl, e bandìs il concors par assegnâ il Premi Leterari in lenghe furlane “San
Simon”, 45e edizion, dedicât a la memorie dal Inz. Agnul M. Pittana, par un romanç e par une conte cu la tecniche dal fumet.

  • ROMANÇ: lis oparis a varan di sei scritis doprant no mancul di 150.000 caratars, comprendûts i spazis. I tescj, anonims, a àn di sei inedits e scrits
    doprant struments informatics inte grafie uficiâl da la lenghe furlane daûr dal art. 13 da la leç regjonâl 15/96 e integrazions e modifichis seguitivis. Si
    varà di consegnâ trê copiis su cjarte da lis oparis e ancje, pene la esclusion dal concors, une copie su supuart informatic in formât Word. Ni lis copiis su
    cjarte ni chê informatiche a saran tornadis indaûr.
  • CONTE A FUMETS: lis oparis a varan di vê no mancul di cuatri taulis cuntune numerazion progressive. Lis misuris dal lavôr in origjinâl a varan
    di sei compatibilis cul formât di cm 20x28 che, par esigjencis editoriâls, al podarès vignî ridusût in maniere proporzionâl. Il test dal fumet al varà di sei
    inedit e scrit inte grafie uficiâl da la lenghe furlane daûr dal art. 13 da la leç regjonâl 15/96 e integrazions e modifichis seguitivis. Lis oparis a podaran
    sei in blanc e neri o a colôrs e fatis cun cualsisei tecniche che si puedi riprodusi su la cjarte. Si varà di consegnâ lis oparis, pene la esclusion dal
    concors, su supuart informatic cun risoluzion massime di 330dpi sedi tal formât TIFF che tal formât JPG/JPEG. Par une cualitât di stampe miôr, si
    varà di consegnâ lis taulis in colôr CMYK (no in RGB). I elaborâts su cjarte a puedin sei fin al 30% plui grancj rispiet a chei digjitâi. I origjinâi a son
    di consegnâ cun trê fotocopiis alegadis. In alternative al pues sei acetât un pdf cun risoluzion tipografiche da la scansion dai elaborâts su cjarte. I
    origjinâi su cjarte da lis oparis no premiadis a saran tornâts indaûr ai autôrs cun modalitâts di concuardâ. Si da tant che sugjeriment no vincolant pe
    ideazion dal fumet il mût di dî “Cjatâ chel dal formadi”.

Dal sît dal Comun di Codroip si pues discjamâ il volantin cul bant di concors.

Par vê plui informazions si pues scrivi a premisansimon(at)comune.codroipo.ud.it

Dutis lis oparis presentadis al concors a varan di sei coretis, definitivis e prontis pe stampe, e a varan di rivâ dentri da lis oris 12:00 di lunis ai 15 di Lui dal 2024 li dal Ufici Protocol dal Comun di Codroip.

La proclamazion dai vincidôrs si le fasarà tal dì di San Simon, lunis ai 28 di Otubar dal 2024.

Indaûr