“Una splendida favella - L’avventurosa storia della lingua friulana e della sua letteratura” e rive in television, joibe ai 26 di Setembar, propit in ocasion de Zornade Europeane des Lenghis. Su Telefriuli (canâl 11), aes 22.00, e larà in onde la performance cun protagoniscj Flavio Santi (docent di divignince furlane te Universitât de Insubria) e William Cisilino (diretôr de ARLeF - Agjenzie regjonâl pe lenghe furlane).

Acetant la sfide di contâ plui di mil agns de storie de lenghe e de sô leterature in mancul di une ore, Santi e Cisilino a compagnin il public intun viaç inedit che al rispuint a domandis tant che: cuâi sono i popui che a àn dât forme ae lenghe ladine plui orientâl? Cui sono lis feminis e i oms che, za de Ete di Mieç, a àn sielzût di rivendicâ l’ûs de marilenghe par fâ art? Ma soredut: parcè il furlan isal une lenghe?

“Al è un itinerari che al mene fin a vuê, par po capî cuâl che al sarà il furlan di doman e, in gjenerâl, cemût che a funzionin lis lenghis” al à anticipât Cisilino. “O cîr di dimostrâ trop che la leterature furlane e sedi di simpri une vore moderne, in linie cu lis leteraturis talianis e europeanis, e che no à nuie di mancul di chestis” al marche Santi, che inte performance al lei cualchi poesie che e dimostre la grandece e la origjinalitât dal furlan.

Spietant "Una splendida favella", aes 21.00, simpri su Telefriuli, al è in program un speciâl dedicât ae lenghe furlane. A intervignaran il president de ARLeF, Eros Cisilino; la tiktoker dal canâl Tic e Tac Furlan, Greta Fabbro; Michele Flaibani, diretôr organizatîf dal scandai sociolinguistic "Furlan Contât - Tire fûr la lenghe", davuelt di pôc di IRES Fvg; il youtuber di YouPalTubo, Nicolas Fonzar; il za citât professôr Flavio Santi; e l'ilustradôr, "pari" dai Gnognosaurs, Andrea “Dree” Venier.