Il tierç romanç in lenghe furlane di Carlo Sgorlon, mandât fûr postum tal 2010 de Societât Filologjiche Furlane, al va in sene in gracie dal contribût di Franco Fabbro e Marco D'Agostini, curadôrs dal volum "Carlo Sgorlon. Scrittore e intellettuale friulano", publicât tal 2020.

Il spetacul, metût in vore dal Teatro della Sete inte suaze dal festival culturâl "vicino/lontano" 2021, al met adun peraulis che Sgorlon al à scrit su la proprie vite, e su altris temis che i stavin a cûr, e tocs gjavâts fûr dal romanç.

La musiche dal vîf e i dissens origjinâi a acompagnaran la leture de opare par riprodusi lis atmosferis, i personaçs e lis vicendis de conte, daûr de poetiche e de concezion dal mont che al veve il scritôr.

L'event, finanziât de ARLeF (Agjenzie Regjonâl pe Lenghe Furlane), si tignarà joibe ai 1 di Lui aes 9 e mieze sot sere tal Oratori dal Crist a Udin, cun jentrade sore nuie.