Lis gnovis dal Sportel
Lenghe furlane: i locutôrs atîfs a son 444.000
Al è il dât che al ven fûr dai prins risultâts di “Tire fûr la lenghe”, la ricercje IRES FVG - ARLeF fate in Friûl-VJ e tal Venit orientâl
La lenghe furlane le fevelin vuê in maniere ative 444.000 personis (che a corispuindin a plui de metât de popolazion residente intai Comuns dal Friûl-Vignesie Julie e dal Venit orientâl che si son declarâts di lenghe furlane). Chest numar al rive cuasi a 700.000 (ven a stâi 9 personis su 10) se si ten cont ancje di chei che dome le capissin. Lis areis dulà che l’ûs atîf dal furlan al regjistre lis percentuâls plui altis a son chês dal Friûl centrâl, de zone culinâr e de Cjargne. In pratiche, te plui part des areis cjapadis dentri de indagjin il furlan lu fevele almancul une persone su 2, e une su 4 e podarès recuperâ la sô competence de lenghe se e vignìs sburtade a doprâle. Sorpresis positivis a rivin ancje di citâts tant che Udin, Pordenon e Gurize.
Il vierzisi in gjenerâl al plurilinguisim, che par plui dal 56% al è un grant vantaç e il volê cognossi miôr la lenghe furlane, che al tocje il 63% dai intervistâts a son altris segnâi parimentri interessants, come ancje il so ûs tes gnovis formis di comunicazion digjitâl tant che codiç adat pe imediatece tes relazions.
I dâts a rapresentin i risultâts principâi de ricercje sociolinguistiche “Tire fûr la lenghe”, che e je part ad in plen dai intervents previodûts dal Plan gjenerâl di politiche linguistiche pe lenghe furlane 2021-2025. Il studi al nas par capî e par analizâ l’ûs de lenghe furlane e di chês altris lenghis che si fevelin in Friûl. Il lavôr, sostignût de Regjon F-VJ e metût in vore cul contribût de ARLeF, al è stât puartât indenant de IRES FVG e dal FEF (Forskningscentrum för Europeisk Flerspråkighet). Tra il mês di Avrîl e chel di Jugn dal 2023, cu la compilazion di un cuistionari a son stadis cjapadis sù plui di 4.300 intervistis in 178 Comuns. Il campion de ricercje al garantìs une grande rapresentativitât sedi di gjenar che di fassis di etât: i 74 istitûts comprensîfs che a àn partecipât, di fat, a àn contribuît cui lôr insegnants a puartâ il scandai tes fameis.
I ricercjadôrs cumò a son daûr a elaborâ une analisi complessive dal grant volum di dâts cjapâts sù, cul obietîf di metiju a complete disposizion dal public dentri de fin dal an. Dut câs, a vegnin za fûr riflessions interessantis: chê plui impuartante e pant che la lenghe furlane e je inmò presinte in maniere consistente te plui part dal teritori furlan e che e rapresente une part fondamentâl dal patrimoni linguistic e culturâl dal Friûl.
Un grant sens di identitât
Il sens di apartignince e la identitât furlane si afermin in maniere clare te plui part des areis cjapadis dentri de ricercje: il 52% dal campion al dîs di sintîsi “une vore” furlan, percentuâl che e rive al 75% se si ten cont ancje di cui che al declare di jessilu “avonde”.
La ricercje e mostre ancje che al esist un teren ideologjic favorevul: di fat, la disposizion positive bande il furlan, calcolât tant che un codiç simbolic e identitari, e je cressude une vore e in maniere trasversâl.
Di là dai teritoris extraurbans, li che il furlan al à simpri vût une difusion plui grande, al è interessant analizâ il dât dai locutôrs atîfs intes trê citâts principâls dal Friûl: Udin, Pordenon e Gurize. In particolâr, par Gurize e Pordenon la ricercje e presente une situazion tant plui positive di ce che si pensave: se a Udin il 40% dai intervistâts a fevelin la lenghe furlane, a Gurize a son il 23% e a Pordenon il 18%; tal stes ordin, invezit, lu capissin l’82%, il 73% e il 55%.
I citadins a domandin plui invistiments pe lenghe furlane
Si à di evidenziâ ancje che i citadins a son favorevui a doprâ i bêçs publics par ativitâts di supuart al furlan. Ur è stât domandât di declarâ trops euros, di chei che a pain za di tassis, a podessin rapresentâ un valôr just par finanziâ misuris di sostegn: une percentuâl impuartante, il 77%, e je a favôr, cuntune medie di 22 euros parom, plui o mancul cuatri voltis ce che si invistìs vuê par chês misuris intun an.
In famee il furlan al ten
Lis percentuâls nus disin che il furlan al è une lenghe ancjemò vive inte comunitât: e je prevalente fra chês feveladis dai gjenitôrs dal intervistât (51%); cu la mari e cul pari, invezit, le doprin il 44% dai intervistâts.
Un altri dât impuartant al è che pal 79% di chei che a àn rispuindût al scandai, il fat di fevelâ plui lenghis in famee nol è un ostacul pal aprendiment scolastic, anzit, al rapresente un vantaç. La plui part dai intervistâts, cuasi il 70%, adun cul 59% di chei dal Venit orientâl, si augure che il furlan al sedi plui presint intes scuelis. Al è un risultât che al conferme lis percentuâls regjistradis ogni an intes scuelis dal Friûl cuant che i gjenitôrs a sielzin l’insegnament de lenghe furlane pai lôr fîs.
Plui furlan intai media e te AP
Tal cjamp de comunicazion, si note che il furlan al ven doprât di plui tes plateformis di messazistiche istantanie, dulà che par esempli une persone su 4 lu sielç pai messaçs vocâi; lis percentuâls a mostrin ancje che il furlan online al è plui scoltât che let o scrit. I intervistâts a calcolin il furlan tant che un codiç adat pe imediatece comunicative, confermant in maniere positive la sô presince intun setôr tant slargjât.
La analisi de sezion dedicade ae aministrazion publiche e evidenzie che intai uficis publics e intai rapuarts cu la aministrazion comunâl l’ûs dal furlan al à ancjemò di afermâsi dal dut, aben che il 42% dal campion lu segnali tra lis lenghis uficiâls che a varessin di jentrâ intal contest aministratîf locâl. Al è un ricognossiment indiret de percezion dal valôr de lenghe furlane, un altri element che al fâs capî che no son prejudizis tal doprâle ancje in ambits “alts” e che tal stes timp al conferme il calâ progressîf dal stereotip che lis lenghis minoritariis a sedin adatis dome pal ambient familiâr.
![](/fileadmin/user_upload/gnove_friulaniparlanti_1024x768.jpg)