II Centri interdipartimentâl pal disvilup de lenghe e de culture dal Friûl (CIRF) de Universitât di Udin al memoree la ricorence de fieste de Patrie dal Friûl (ai 3 di Avrîl) cu la organizazion dal spetacul musicâl “La Sabide. Alle origini del Cristianesimo aquileiese”. L’event, che al ven promovût in colaborazion cul coleç statâl Uccellis, cu la associazion musicâl “Sante Sabide”, cu la scuele di musiche “Città di Codroipo” e cu la associazion culturâl “Don Gilberto Pressacco”, al è in program domenie ai 31 di Març a vot e mieze di sere inte glesie di Sante Clare, in vie Glemone 23 a Udin, cu la jentrade libare e gratuite. «La azion seniche – al sclarìs il so autôr, Luca De Clara – si fâs in cinc cuadris par côr, atôrs e musiciscj e e je une sorte di viaç tra religjon, storie e atualitât ae ricercje des lidrîs mediteraniis e contaminadis de culture furlane». A saran sul palc la corâl “Sante Sabide” di Guriciz, direzude di Cristian Cozzutti, la compagnie teatrâl “Sot la Nape” di Vildivar e i arlêfs dal Dipartiment di teatri de scuele di musiche “Città di Codroipo”, cu la regjie di Monica Aguzzi.

Culì la locandine.