Si è davuelte vuê, lunis ai 10 di Lui, vie pe matinade, la cerimonie di scree des primis targhis memoreativis che cun chês il Comun di Udin al à volût onorâ trê personaçs innomenâts dal passât furlan, ven a stâi Jacopo Pirona, Aurelio Cantoni e il professôr Gianfranco D'Aronco. L’event, che si è disvilupât in trê puescj e in trê oraris diferents, al è nassût in graciis de colaborazion fra Comun di Udin, Regjon e ARLeF.

Aes 10, te Loze dal Lionel in place Libertât, in presince dal sindic De Toni e dal assessôr ae culture Pirone e je stade scuvierte la targhe in onôr di Gianfranco D’Aronco, docent di Filologjie romaniche e grant cognossidôr e studiôs de leterature, de lenghe e des tradizions furlanis. Pe ocasion a son intervignûts il fi, Antonio D’Aronco, e il diretôr de ARLeF, William Cisilino.

Une ore dopo, aes 11, te biblioteche civiche “Vincenzo Joppi” e je stade la volte de targhe in onôr di Jacopo Pirona, docent e leterât dal Votcent che al à no dome progjetât la biblioteche citadine, ma soredut realizât il prin vocabolari de lenghe furlane. A ricuardâlu a son stâts Romano Vecchiet, za diretôr de biblioteche civiche, e il professôr Federico Vicario, docent universitari e president de Societât filologjiche furlane.

Aes 12 infin, in vie Anton Lazzaro Moro 26, e je stade screade la targhe dedicade a Aurelio Cantoni 'Lelo Cjanton', scritôr poliedric in lenghe furlane e ancje promotôr de autonomie regjonâl, presentât pe ocasion dal scritôr Eddi Bortolussi.

A rapresentâ il CIRF al è stât il professôr Enrico Peterlunger, che tant che diretôr dal Centri interdipartimentâl al à partecipât a ducj chescj moments impuartants.

O ricuardìn infin che cheste e je dome la prime part de iniziative, stant che plui indenant altris trê figuris a vignaran onoradis inte stesse maniere, ven a stâi Novella Cantarutti, Tiziano Tessitori e pre Josef Marchet.