La gnove mostre virtuâl organizade dal Ateneu furlan e je dedicade a I oms che a àn fate la bibliografie furlane. Giuseppe Valentinelli, Giuseppe Occioni Bonaffons, Vincenzo Joppi" . La esposizion e ricostruìs lis biografiis dai trê protagoniscj, nassûts e cressûts intal Votcent, doprant ancje lis lôr oparis plui significativis che a son conservadis te Biblioteche Florio e in altris Fonts speciâi dal Sisteme Bibliotecari dal Ateneu.

La prime sezion e ricostruìs il moment storic cuant che e je nassude la esigjence di individuâ e di descrivi i scrits fondamentâi par ricostruî la storie furlane. Lis sezions dopo a son dedicadis ai trê bibliografs e bibliotecaris che a àn fondade la bibliografie furlane: Giuseppe Valentinelli (tal 150° inovâl de muart), Giuseppe Occioni Bonaffons (a cent agns de sô muart) e Vincenzo Joppi (a dusinte agns de sô muart).

La mostre e je stade ideade e curade de Aree Bibliotechis dal Ateneu e e insiore la biblioteche digjitâl de Universitât dal Friûl, TECHE.uniud: e je la cuarte propueste in formât digjitâl. Prin di cheste mostre a son stadis publicadis lis esposizions su lis memoriis de presince di Napoleon Bonaparte in Friûl; su lis principâls presincis e leturis feminîls peadis ae Biblioteche Florio dal Sietcent al Nûfcent; su lis ilustrazions riferidis ai valôrs e a lis virtûts umanis dai alpins. Dutis lis mostris si puedin visitâ a gratis, al baste clicâ sui leams marcâts in blu.