Une buine gnove par cui che al prodûs audiovisîfs in lenghe furlane. Il prin bant dal 2022 dal Fonts Regjonâl pal Audiovisîf al previôt un finanziament pai prodots audiovisîfs in lenghe furlane, in graciis di une colaborazion tra il Fonts stes e la ARLeF e daûr di ce che al è indicât tal gnûf Plan Gjenerâl di Politiche Linguistiche 2021-2025.

Il finanziament al vignarà dât a progjets tant che fiction, curtmetraçs, documentaris e cines di animazion par furlan che, in plui di vê une alte cualitât artistiche e sodisfâ ducj i recuisîts che a coventin in gjenerâl a varan vude la aprovazion de Agjenzie par ce che al tocje cualitât linguistiche.

Lis domandis a van presentadis al Fonts Regjonâl pal Audiovisîf dentri dai 25 di Març dal 2022.

Dutis lis informazions, plui in detai, si cjatin culì: https://arlef.it/finanziaments-pai-audiovisifs-in-lenghe-furlane/ e http://www.audiovisivofvg.it/2022/02/al-via-il-primo-bando-2022/