La pandemie no à fermât la metude in vore di events e incuintris culturâi e ancje la HIGA, la cunvigne dai zovins che la lôr lenghe proprie e je une lenghe minorizade, nol à fat ecezion. E je stade inmaneade ancje chest an, ma in modalitât virtuâl. Par chel e cambie non e di HIGA si stramude e-GA, ma no cambie la sô sostance.

Cun di fat ancje par chest an l'event al cjaparà dentri moments di poesie, di musiche, une cunvigne e ancje la premiazion di un concors pai progjets in cont des comunitâts e des iniziativis di cooperazion linguistiche.

L'incuintri, fissât par vinars ai 11 di Jugn, des 7 aes 9 sot sere, al sarà insiorât de presince dal scritôr, presentadôr e sociolinguist Kike Amonarriz che al fasarà un intervent dal titul "Locutôrs zovins te crosere de rivitalizazion linguistiche".

La lenghe dal event e sarà il basc e e vignarà garantide la traduzion simultanie par inglês, par castilian e inte lenghe dai segns castiliane.
La partecipazion e je libare e sore nuie e si pues stâ daûr dal incuintri li de direzion web https://youtu.be/f4bVBEDK6zA.