Il “cjantôr contestoriis” di Italie, Angelo Branduardi, al sarà ospit de citât di Aquilee ai 17 e 18 di Lui prossims. Un dopli apontament, organizât dal Comun di Aquilee, ancje cu la colaborazion de ARLeF – Agjenzie regjonâl pe lenghe furlane.

Il cjantautôr e polistrumentist al è cognossût di fat ancje pe sô reinterpretazion innomenade de balade popolâr “Scjaraçule Maraçule”, atribuide a Giorgio Mainerio.

Branduardi, cul so stîl unic e ricercjât, al à componût cjançons influençadis di musichis antighis, ma ancje di sonoritâts folk europeanis e americanis, in plui che dal rock progressîf. Al è un apassionât di musichis tradizionâls di dut il mont. Tal passât si è interessât ae musiche popolâr furlane. Cognossude la opare di Mainerio, al à fat une sô reinterpretazion, la famose “Ballo in fa diesis minore”.

Branduardi al sarà protagonist, lunis ai 17 di Lui, aes 8 di sere, inte sale consiliâr dal Comun di Aquilee, in place Garibaldi. Li al presentarà il so libri Confessioni di un malandrino: autobiografia di un cantore del mondo, publicât di Baldini e Castoldi, dialogant cul gjornalist dal Messaggero Veneto, responsabil des pagjinis di culture e spetacul, Oscar D’Agostino. Al presentarà la serade il sindic di Aquilee, Emanuele Zorino.

Invezit, la sere dopo, martars ai 18 di Lui, il cjantautôr si esibirà intun conciert, simpri a Aquilee, in place dal Cjapitul, des 9.30 di sere.

Ducj i doi i events a son a jentrade libare. 

Informazions e prenotazions: 389 2858620; aquileiachemusica(at)gmail.com