La rassegne culturâl “Art in Cort” al so prin an di vite e va dilunc cuntun altri apontament une vore interessant inte suaze dal cicli di incuintris dal titul “San Simon in Cort”, une iniziative pensade par presentâ al public i scritôrs che a àn vinçût il premi San Simon, ven a stâi il plui impuartant premi leterari in lenghe furlane.

Il gjornalist Walter Tomada si confrontarà duncje cun Gianluca Franco, scritôr che inte edizion dal 2020 al è rivât prin te sezion dedicade ai romançs cu la opare "See the Sky about to rain - Balade pai timps di ploie".

L'incuintri si davuelzarà joibe ai 26 di Avost aes 7 sot sere, inte cort di Palaç Mantica in vie Manin 18 a Udin, dulà che e à sede la Societât Filologjiche Furlane, che e inmanee e coordene la manifestazion.

La jentrade al incuintri e je sore nuie e fin a esauriment dai puescj disponibii, in câs di brut timp l'event si tignarà intal salon di onôr di Palaç Mantica. Par vê plui informazions si pues clamâ il numar 0432 501598 o pûr scrivi ae direzion di pueste eletroniche info(at)filologicafriulana.it.