Angelo Montanari al è il gnûf retôr de Universitât dal Friûl pai prossims sîs agns academics, dal 2025 al 2031. Al è il decim retôr de Universitât furlane. Al è stât elet ai 2 di Avrîl, al secont turni di votazion, cun 329 vôts, invezit Fabiana Fusco, chê altre candidade, a 'nd à otignûts 260.
In chest turni, il vincidôr al veve di rivâ almancul al 40% dai vôts, ven a stâi 280 su 699. Lis schedis blancjis a son stadis 32. La partecipazion e je stade dal 84,47%, o sei 963 eletôrs su 1.140 che a vevin dirit di votâ. La prime votazion e je stade fate ai 19 di Març cence risultât, in chê volte Montanari al à otignût 313 preferencis, Fusco 255, invezit e coventave une maiorance assolude dai vôts esprimibii di 352.

Angelo Montanari al è professôr di informatiche tal Dipartiment di matematiche, informatiche e fisiche e delegât de Universitât pal Campus di Pordenon. Dal prin di Otubar al sotentrarà a Roberto Pinton dopo la nomine dal Ministri de Universitât e de Ricercje.

Fabiana Fusco, professore di glotologjie e linguistiche, e je la diretore dal Dipartiment di lenghis e leteraturis, comunicazion, istruzion e societât.

In chest secont turni a àn votât: il 93,48% dai professôrs ordenaris, ven a stâ 172 su 184; l'88,33% dai professôrs associâts, 280 su 317; l'89,57% dai ricercjadôrs, 103 su 115; l'81,82% dai membris dal Consei dai Students, 18 su 22, e il 77,69% dal personâl tecnic aministratîf, 390 su 502. Il personâl al à esprimût un vôt ponderât che al val il 12% dal numar di votants de componente.

Il risultât dal vôt al è stât confermât de Comission eletorâl centrâl cun a cjâf il professôr Dimitri Girotto e proclamât dal dean dai professôrs ordenaris, Enrico Gori. La votazion e je stade fate in rêt des nûf di matine aes sîs di sere.

Il retôr Roberto Pinton al à saludât il gnûf retôr elet, augurantji buine fortune tal so lavôr.