Cumò ancje Facebook al fevele par furlan. Cun di fat si pues sielzilu tant che lenghe de interface di chel che al è il social network plui innomenât.

Ducj i utents de rêt sociâl celebre inventade di Mark Zuckerberg a puedin fâlu intune maniere pardabon semplice: al baste lâ cu la surîs sul menù a tendine che si vierç adalt a diestre sul visôr, selezionâ la vôs che par talian e à non “Impostazioni” e dopo chê in cont de lenghe, là che si pues selezionâ il furlan cul efiet imediât di lei peraulis clâf tant che “Amîs”, “Pagjinis”, “Grups” e “Impostazions”.

Pe lenghe furlane e pal so status chest fat al rapresente, massime in tiermins simbolics, un pas indenant significatîf viers di chê cundizion di normalitât che al è just che e vedi, dopo passe cent agns di minorizazion pesante, tra prejudizis, improibizions plui o mancul esplicits e discriminazions palesis, e dopo almancul un cuart di secul di iniziativis di promozion e di planificazion linguistiche metudis adun propit a pro sô emancipazion.

Su Facebook cumò il furlan si cjate dongje des lenghis di plui grande difusion dal mont, dal inglês al cinês, dal spagnûl al arap, dal francês al hindi, e di chês che, ancje se in cundizion di minorance, a son inviadis di plui timp suntun percors di “normalizazion”, tant che il basc, il galês, il galizian o il frison.

In struc, in graciis de colaborazion tra Regjon Friûl-VJ, ARLeF, Insiel e Meta, cumò la lenghe furlane e je un tic di plui “lenghe” e un tic di mancul  “minorizade”.
 La jentrade dal furlan inte liste des lenghis de interface di Facebook si insuaze inte azions previodudis dal Plan gjenerâl di politiche linguistiche pe lenghe furlane 2021-2025 de Regjon e intun percors che, juste dilunc vie dal ultin cuart di secul, al à viodût la nassite e la cressite di impresis tant che lis cooperativis Serling e Claap e la metude adun di progjets strategjics tant che Grant Dizionari Bilengâl Talian Furlan, il Coretôr Ortografic Furlan e il tradutôr automatic Jude.