Martars ai 27 di Fevrâr dal 2018 il Consei Diretîf dal Centri Interdipartimentâl pal Svilup de lenghe e de culture dal Friûl al à fat buine la graduatorie dai progjets di ricercje che a saran sovenzionâts midiant dai fonts dâts fûr de Regjon in gracie de leç sui finanziaments al sisteme universitari regjonâl (L.R. 2/2011). Des dîs domandis rivadis al CIRF di rispueste al bant specific risiervât al personâl docent e ricercjadôr universitari che al aderìs al CIRF, a vignaran metûts a disposizion in dut 18.000 € pe realizazion di 6 progjets di ricercje, sperimentazion e documentazion su la lenghe e su la culture furlane. Lis propuestis di intervent a tocjin diviers setôrs, lant dal cjamp linguistic a chel juridic, cun studis ancje tal ambit naturalistic e artistic, tant che lis ricercjis sul atlant botanic furlan, su la art de sculture o su la musiche par cines in Friûl. Lis ativitâts si sieraran dentri dai 30 di Setembar dal 2018, cu la realizazion di incuintris, cunvignis, publicazions, mostris, materiâl cartografic e sîts web.