Al è timp fin ai 29 di Avrîl dal 2022 par partecipâ ae gnove edizion dal concors leterari in lenghe furlane Vôs de Basse. Chel che vie pai ultins agns al è deventât un dai concors leteraris in lenghe furlane plui interessants e plui vivarôs al va dilunc pe sô strade cul intindiment di promovi la scriture e la leture par furlan.

Pal 2022 Vôs de Basse, inmaneât dai Comuns di Cjarlins, Gonârs, Muçane, Porpêt, Prissinins e San Zorç di Noiâr, cul patrocini de Societât Filologjiche Furlane e di Radio Onde Furlane, al è struturât in cinc sezions.
Trê a son pai adults – narative, poesie e traduzion – e dôs pai students, par contis curtis e poesiis.

La part dal concors dedicade ai students e ven inmaeade cu la colaborazion di Docuscuele e e je dedicade ae memorie di Gina Marpillero in ocasion dai 110 agns de sô nassite.
Il bant complet e dutis lis informazions che a coventin si cjatin culì.