Dutis lis gnovis
Vie pe Vierte a partissin trê gnûfs cors gratuits di lenghe furlane pai dipendents publics
Il prin, di nivel base, al scomence ai 8 di Avrîl, altris doi ai 3 di Jugn.
Il Centri Interdipartimentâl pal svilup de lenghe e de culture dal Friûl (CIRF) de Universitât dal Friûl al torne a proponi ancje pal 2024 i cors di lenghe furlane indreçâts ai dipendents de Aministrazion Publiche.
Cun di fat, vie pe Vierte a son in partence 3 cors, ognidun di 30 oris di lezion, dividudis in 10 incuintris. Par ducj i 3 la ativitât formative si davuelzarà in linie, su plateforme informatiche Microsoft Teams. Ai corsiscj che a passaran l’esam finâl e che a varan frecuentât almancul l’80% des 30 oris ur vignarà dât un atestât di frecuence.
Il calendari dai cors al è cussì programât:
- cors di BASE dai 8 di Avrîl ai 13 di Mai dal2024, il lunis e il miercus des 14.30 aes 17.30,
- cors INTERMEDI dai 3 di Jugn ai 3 di Lui dal 2024, il lunis des 9.30 aes 12.30 e il miercus des 14.30 aes 17.30,
- cors di BASE o AVANZÅT dai 3 di Jugn ai 3 di Lui dal 2024, il lunis des 14.30 aes 17.30 e il miercus des 9.30 aes 12.30.
Daûr des domandis, pal tierç cors al vignarà ativât un percors di nivel di fonde (nozions di fonde de grafie uficiâl e de gramatiche de lenghe furlane) o di nivel avanzât (par rinfuarçâ il lessic e par aprofondî lis regulis di grafie e di gramatiche).
La iniziative, che e je metude in vore in gracie de leç 482 dai 15 di Dicembar dal 1999 (“pe tutele des minorancis linguistichis storichis”), e rapresente un strument zovevul par chei che a lavorin intun Ent Public tal teritori furlanofon e che a àn voie di insiorâ lis lôr competencis linguistichis e duncje ancje il contat cui utents. Cun di plui, si metin in vore ancje lis indicazions de L. R. 29/2007, che e previôt di doprâ la lenghe furlane intai Ents Publics e intes societâts di servizis ae popolazion.
Par altris informazions e par notâsi si pues contatâ la segretarie organizative dal CIRF al numar 0432.556480 o pûr mandâ un messaç di pueste eletroniche a cirf(at)uniud.it (segretarie dal CIRF) o ben a sportel.furlan(at)uniud.it. Si pues discjamâ il modul di iscrizion dal sît cirf.uniud.it.
Il modul di iscrizion si lu cjate ca sot tai documents in zonte.
