A tornin a tacâ i cors di lenghe furlane inmaneâts dal Centri Interdipartimentâl pal svilup de lenghe e de culture dal Friûl (CIRF) de Universitât dal Friûl e indreçâts ai dipendents de Aministrazion Publiche.

Vie pe Vierte a son in partence 2 cors, par un totâl di 30 oris di lezion ognidun, dividudis in 10 incuintris intes zornadis di lunis e miercus des 14.30 aes 17.30. La ativitât formative si davuelzarà in linie, su plateforme Microsoft Teams. Ai corsiscj che a passaran l’esam finâl e che a varan frecuentât almancul l’80% des oris ur sarà dât un atestât di frecuence.

Il prin cors si fasarà dai 9 di Març ai 20 di Avrîl; il secont dai 4 di Mai ai 10 di Jugn.

Daûr des domandis, al sarà ativât un percors di nivel di fonde (nozions di fonde de grafie uficiâl e de gramatiche de lenghe furlane), o di nivel intermedi (par rinfuarçâ il lessic e par aprofondî lis regulis di grafie e di gramatiche).

La iniziative e je metude in vore in gracie de leç 482 dai 15 di Dicembar dal 1999 (“pe tutele des minorancis linguistichis storichis”), e e rapresente un strument zovevul par chei che a lavorin intun Ent Public tal teritori furlanofon e che a àn voie di insiorâ lis lôr competencis linguistichis e il contat cui utents. Cun di plui, si metin in vore ancje lis indicazions de L. R. 29/2007, che e previôt di doprâ la lenghe furlane intai Ents Publics e intes societâts di servizis ae popolazion.

Par domandâ plui informazions e par notâsi, contatâ la segretarie dal CIRF al n. 0432.556480 o pûr scrivi a cirf(at)uniud.it (segretarie CIRF) o a sportel.furlan(at)uniud.it. Par discjamâ il modul di iscrizion: www.uniud.it/cirf.