A son 12 i zovins argjentins e brasilians di origjin furlane che a àn partecipât al cors di perfezionament Valori identitari e imprenditorialità che la Universitât dal Friûl e veve screât ai 12 di Jugn e che si siere doman, sabide ai 8 di Lui dal 2023.

E je la edizion numar 14 dal progjet formatîf e sientific sul rûl che a àn la lenghe taliane e chê furlane tes comunitâts di coregjonâi in Argjentine e in Brasîl e su la ricjece e diversitât plurilengâl e culturâl dal Friûl-Vignesie Julie. La iniziative e je inmaneade dal Dipartiment di Studis umanistics e dal patrimoni culturâl dal Ateneu cul Ente Friuli nel Mondo e cu la Regjon Friûl-Vignesie Julie.   

«L’obietîf dal cors – e à spiegât la diretore Raffaella Bombi, glotolighe dal Dipartiment di Studis umanistics e dal patrimoni culturâl – al è chel di judâ e insaldâ chel sburt identitari che al è carateristic des gnovis gjenerazions di dissendents dai emigrâts talians intal mont, par tornâ a inviâ l’interès viers la Italie e il Friûl, par svilupâ une culture vierte ae inovazion e meti dongje un bagai di competencis culturâls di podê spindi cuant che a tornaran tai lôr paîs di divignince».