Si sint fevelâ simpri plui dispès dai vantaçs linguistics, cognitîfs e culturâi puartâts di une educazion plurilengâl. Il Friûl, in chest sens, al è un lûc di grandis oportunitâts, in graciis dal insegnament de lenghe furlane a scuele. Une sielte che l’an passât e je stade fate dal 79% des fameis.

Tal moment di notâ i fîs ae scuele de infanzie, ae primarie e ae secondarie di prin grât, tacant dai 18 di Zenâr dal 2024 (e fin ai 10 di Fevrâr), i gjenitôrs a podaran sielzi di zovâsi dal insegnament dal furlan par dut il cicli scolastic dai lôr fîs. Il percors didatic al è di almancul 30 oris di studi par an e nol gjave timp a altris materiis. Di fat, la leç e fisse che al sedi inserît tal 20% dal curriculum individuât des scuelis in autonomie. La sielte dai gjenitôrs di zovâsi dal insegnament de lenghe furlane si à di fâ tal moment de iscrizion online sul portâl dal MIUR www.istruzione.it/iscrizionionline (tal câs de scuele primarie e de scuele secondarie di prin grât) o suntun modul di cjarte (tal câs de scuele de infanzie). Si pues contatâ ancje la segretarie de scuele par altris sclariments.

Vê la pussibilitât di imparâ e doprâ plui lenghis par comunicâ (come il talian e il furlan) al è pardabon une ricjece di meti a pro inte vite. Cressi cun plui lenghis za di piçui, di fat, al permet di imparâ in maniere plui facile altris lenghis, tant che l’inglês, ma no dome. Lis provis sientifichis a dimostrin cemût che i fruts bilengâi a cressin cun capacitâts di aprendiment, velocitât di comprension, abilitâts logjichis matematichis e creativis plui altis, e cun di plui, si adatin in maniere plui naturâl ai cambiaments, vint une viertidure mentâl plui largje par chei altris. Po dopo e je ancje la salût dal cerviel: par cui che al fevele plui lenghis, si manten zovin e elastic, intardant i risis di demence e di Alzheimer.

Sul sît de ARLeF te sezion Furlan a scuele si puedin consultâ videos, intervistis e altris materiâi che a spieghin i vantaçs pai fruts di une educazion plurilengâl.