In ocasion dai dîs agns de muart di pre Toni Beline (Vençon, 11 Fevrâr 1941 – Visepente di Basilian, 23 Avrîl 2007), Glesie Furlane e à inmaneât une lungje schirie di iniziativis, adun cun altris ents e associazions, jenfri di chei ancje la Universitât dal Friûl e il Centri Interdipartimentâl pal Svilup de Lenghe e de Culture dal Friûl (CIRF). Lis manifestazions a cjapin dentri ducj i puescj li che pre Toni Beline al veve predicjât o al jere stât mestri, ven a stâi Basilian, Vençon, Treli, Rualp Val e Codroip, cun doi apontaments ancje a Udin e a Çuian, li dal Centri Balducci. Tra i apontaments za passâts, lis cjaminadis di Visepente a Vilecjaze e di Trelli a Rualp-Val, pai trois che pre Toni al jere solit fâ in vite, la intitulazion de Biblioteche Civiche di Basilian a pre Toni Beline e de Sale Civiche dal Palaç Orgnani Martina di Vençon a Pre Antoni Beline e la cunvigne “Lis peraulis di pre Toni” a Rualp-Val, te suaze de Setemane de Culture Furlane. I prossims incuintris si fasaran a Codroip, ai 13 di Jugn, cu la presentazion de opare leterarie di pre Antoni Beline “Su lis olmis di pre Toni Beline – L’om, il predi, l’inteletuâl” e a Gjalarian, ai 25 di Jugn, cun leturis di tocs gjavâts fûr des oparis di pre Beline. Ai 2 di Lui si fasarà une messe su la cime dal Tersadie, li che e vignarà ancje poiade une lapide in so ricuart. Tal mês di Setembar a Visepente e vignarà inmaneade une mostre su pre Toni, intant che ai 24 di Setembar a Vençon e vignarà fate la cunvigne “Tradusi cence tradî: su la oportunitât di voltâ in altris lenghis lis oparis di pre Antoni”. Pai 2 di Otubar, invezit, e je in program la cunvigne par cure dal CIRF: “La universalitât dal pinsîr di pre Toni Beline”, li dal Palaç di Toppo Wassermann de Universitât dal Friûl.