Domenie ai 11 di Setembar stâts a Barcis e je stade fate la premiazion de edizion numar 34 dal concors di poesie tai dialets e tes lenghis “altris” dal Stât talian dedicât a Giuseppe Malattia della Vallata.

La jurie, componude dal president Tommaso Scappaticci e di Roberto Malattia, Aldo Colonnello, Fabio Franzin, Rosanna Paroni Bertoja, Fabio Maria Serpilli, Christian Sinicco e Giacomo Vit, e à decidût di dâi il prin premi a Alfredo Panetta, autôr di un componiment par calabrês dal titul «Cori ‘i cimentu» (Cûr di ciment), preseât pe sô fuarce espressive e pal so impegn civîl, stant che al è une sorte di orazion pes vitimis de 'ndrangheta.

Chei altris doi ricognossiments a son lâts a dôs autoris furlanis: il secont premi lu à cjapât Serena Fogolini cui siei viers dal titul «Spleen da la Cjargne», il tierç al è stât dât a Cristina Micelli, autore di «Lis bicicletis a sotet tal fis dai noglârs».

Al bant dât fûr dal Comitât che al inmanee il premi adun cul Comun di Barcis e cu la Pro Loco, cu la colaborazion de Fondazion Pordenonelegge e dal Circul culturâl Menocchio e cul jutori de Regjon, a vevin rispuindût in 155 di lôr, presentant passe cinccent poesiis. 

Tra i dîs autôrs che a vevin passât la ultime selezion prime de atribuzion dai premis finâi a jerin ancje altris doi furlans: Francesco Endrigo e Giovanni Tuzet.