Al è jessût il bant pal concors leterari plui impuartant pai scrits in lenghe furlane, il Premi San Simon, rivât ae edizion numar 44.

Il Comun di Codroip, in colaborazion cu la ARLeF, la Societât Filologjiche Furlane, l’Istitût Ladin Furlan Pre Checo Placerean e Ente Friuli nel Mondo, al à publicât il bant dal Premi San Simon 2023, dedicât ae memorie di Agnul Pitane.

Chest an il concors al vûl ancje fâi onôr al scritôr Sergio Maldini intal centenari de nassite, in gracie de colaborazion de famee Maldini. Di fat chest an il premi al sarà assegnât par dôs sezions:

• racuelte di contis
• traduzion de conte Il Friuli perduto di Sergio Maldini.

Par presentâ lis oparis al Comun di Codroip al è timp fin ai 30 di Jugn dal 2023 (aes 12.00).
Par informazions si pues scrivi a premisansimon(at)comune.codroipo.ud.it

I vincidôrs a saran proclamâts ai 28 di Otubar, dì di Sant Simon.

Par ducj i detais si pues discjamâ il bant complet e la conte di voltâ sul sît dal Comun di Codroip.