Lunis ai 2 di Avost dal 2021, aes 21.00, al bignarà presentât in anteprime il gnûf documentari in lenghe furlane di Marco D’Agostini, Patriae – Viaç tal Patriarcjât di Aquilee coprodusût di Informazione Friulana, ARLeF e ALL. Il film al è inserît inte suaze de Edizion XII dal Aquileia Film Festival, rassegne internazionâl di cine, art e archeologjie de Fondazion Aquileia.

La pelicule, che e dure 50 minûts, e mostre il viaç di Carolina, une fantate di cutuardis agns che e fâs une ricercje sul Patriarcjât di Aquilee e e racuei sul teritori i passaçs plui significatîfs di plui di trê secui di storie, ven a stâi dal 1031, an de costruzion dal tor de basiliche volude dal patriarcje Popon fintremai il 1420, cuant che il Patriarcjât al fo cjapât dentri de Republiche di Vignesie.

Un viaç duncje che al permet di tocjâ cetancj aspiets de Ete di Mieç furlane tra art, culture, religjon, geopolitiche, architeture, societât e teritori, plaçantle te sô naturâl suaze internazionâl e europeane.

La proiezion e sarà in Place dal Cjapitul a Aquilee cui sottitui par talian. Cun di plui al sarà un moment di dialic cul regjist Marco D’Agostini e cun Angelo Floramo.

Par cjapâ part ae presentazion e je obligatorie la prenotazion in linie a chest leam.