Il so titul al è La Universitât dal Friûl tal teritori e al è un gnûf program di Radio Onde Furlane, metût adun in colaborazion cul nestri Ateneu cul intindiment di lâ plui a fonts su lis iniziativis, lis ricercjis e i progjets puartâts indenant de Universitât, cul e pal Friûl.

La serie di trasmissions, screade ancjemò ae fin dal an passât, ai 22 di Dicembar, cu la prime pontade dedicade al progjet Cantiere Friuli, e je struturade in dodis pontadis.

Par ognidune di chês a son previodudis trê emissions: la joibe a 8 e mieze di buinore e, in repliche, il vinars a cuatri e mieze dopodimisdì e la domenie a dîs e mieze di matine.

La gnove serie radiofoniche e viôt alternâsi ae conduzion Carli Pup e Margherita Cogoi. A coordenâ la part tecniche al è Ferdinando Passone intant che a stâ daûr di chê organizative al è Rudy Citossi.